बारपाक सुलिकोट गाउँपालिकाले यस बर्षको एसईई परीक्षामा उत्कृष्ट नतिजा ल्याउने पालिकाका बिद्यार्थीलाई प्रोत्साहन रकम उपलब्ध गराउने भएको छ । मंगलवार सार्वजनिक सूचना जारी गर्दै ४ जिपिए ल्याउने बिद्यार्थीलाई एक लाख रुपैया उपलब्ध गराउने घोषणा गरेको हो ।
त्यस्तै ३.९० देखि ३.९९ जिपिए ल्याउनेलाई ५० हजार, ३.८० देखि ३.८९ जिपिए ल्याउनेलाई २५ हजार, ३.७० देखि ३.७९ जिपिए ल्याउनेलाई २० हजार र ३.६० देखि ३.६९ जिपिए ल्याउनेलाई १५ हजार नगद पुरस्कार प्रदान गर्ने पालिकाले जनाएको छ ।
परीक्षाका लागि विद्यार्थीलाई मनोवल बढाउँदै थप हौसला प्रदान गर्न प्रोत्साहन रकम घोषणा गरिएको पालिका अध्यक्ष बिष्णु भट्टले बताए । ‘गत माघ २५ गते बसेको गाउँ कार्यपालिकाको बैठकले यो निर्णय गरेको हो,’ उनले भने, ‘आगामी बर्षहरुमा पनि यो कार्यक्रमले निरन्तरता पाउछ ।’ शिक्षाको गुणस्तर कामय गर्न पनि यसले सहयोग पुग्ने उनको अपेक्षा छ ।
चैत्र ७ गतेबाट संचालन हुन लागेको एसईई परीक्षामा बारपाक सुलिकोट गाउँपालिकाबाट नियमिततर्फ २९८ जनाले एसईई परीक्षा दिदैछन् । ग्रेडवृद्धितर्फ ७३ जना सहभागी हुने पालिकाको सूचनामा उल्लेख छ ।
