नेपाल कम्युनिष्ट पार्टी (माओवादी) को कार्यकर्ता भन्दै जवरजस्ती चन्दा असुल गरेको आरोपमा प्रहरीले दुई जनालाई पक्राउ गरेको छ । पक्राउ पर्नेमा पालुङटार नगरपालिका ७ च्याङ्लीका ३८ वर्षीय अमृत सापकोटा र मिक्लाजुङ गाउँपालिका –९ मोरङका ३८ वर्षीय राजकुमार माझी रहेको प्रहरीले जनाएको छ ।
शहिद लखन गाउँपालिका १ बक्राङमा चन्दा असुल गर्दै गरेको अवस्थामा सोमवार उनीहरुलाई पक्राउ गरिएको डिएसपी राजकुमार श्रेष्ठले बताए ।
‘वक्राङ खहरेटोलस्थित रामलक्ष्मण सामुदायिक वनका सचिव रामबहादुर भुजेलसँग चन्दा असुल गर्दै गरेको अवस्थामा उनीहरुलाई पक्राउ गरेका हौ,’ उनले भने, ‘उनीहरुको साथबाट नगद २० हजारसहित पार्टीको लेटरप्याड दुई थान, एक थान छाप र ५० प्रति पर्चा पम्प्लेट समेत बरामद गरेका छौ ।’
ज्यान मार्ने धम्की समेत दिँदै जवरजस्ती चन्दा असुल गर्ने गरेको सूचना पाएलगतै उनीहरुलाई पक्राउ गरिएको डिएसपी श्रेष्ठले जानकारी दिए ।
