४ असार, गोरखा । ट्याक्सीको भाडा समायोजनमा प्रशासनले वेवास्ता गरेको भन्दै जिल्लाका ट्याक्सी व्यवसायीहरुले गुनासो गरेका छन् । पेट्रोलियम पदार्थको मूल्य दिनानुदिन बढेपनि भाडा समायोजन नहुँदा आफूहरु मर्कामा परेको उनीहरुको भनाइ छ ।
जिल्लामा ट्याक्सी सेवा संचालन गर्दै आएको गोरखा मनकामना यातायात सेवा प्रालिको शनिवार भएको पाँचौ साधारण सभामा सहभागीहरुले सो कुरा बताएका हुन् । ‘तेलको मूल्य बढेको बढै छ,’ प्रालिका अध्यक्ष अमृत लामिछानेले भने, ‘भाडा समायोजनका लागी बैठक बोलाइदिन भनेर गत मंसिर १ गते पत्र मार्फत प्रमुख जिल्ला अधिकारीलाई आग्रह गर्दापनि अहिलेसम्म बैठक बोलाउनु भएको छैन ।’
साधारण सभाको अवसर पारेर प्रालिले आगामी आर्थिक बर्षको निति तथा कार्यक्रम पनि घोषणा गरेको छ । ट्याक्सीको मिटर, भाडादर, चालक पोशाक लगायतका बिषयलाई समेटेर निति तथा कार्यक्रम तयार पारिएको प्रालिका अध्यक्ष लामिछानेले बताए ।
प्रालिका अध्यक्ष लामिछानेको अध्यक्षता तथा गोरखा नगरपालिकाका मेयर कृष्ण रानाको प्रमुख अतिथ्यतामा भएको कार्यक्रममा सहायक प्रमुख जिल्ला अधिकारी कमलराज भण्डारी, प्रहरी निरिक्षक हिमनाथ घिमिरे, जिल्ला ट्राफिक प्रमुख प्रेम प्रकाश पोखरेल, गोरखा दरौदी यातायात सेवा कम्पनी प्रालिका अध्यक्ष नारायण खत्री, पृथ्वी राजमार्ग बस संचालक कम्पनी प्रालिका रामबाबु भट्ट, गोरखा उद्योग वाणिज्य संघका अध्यक्ष कृष्ण कुमार श्रेष्ठ लगायतले मन्तव्य राखेका थिए ।
