२६ साउन, गोरखा । नेपाली कांग्रेसका केन्द्रिय सदस्य सुरेन्द्रराज पाण्डेले आसन्न निर्वाचनमा गोरखामा कांग्रेस र माओवादी केन्द्र बिच मात्र चुनावी तालमेल हुने बताएका छन् ।
सत्ता गठवन्धनमा रहेका अन्य दलहरुको औचित्य जिल्लामा खासै नभएको तर्क गर्दै उनले दुई पाटी बिच मात्र चुनावी तालमेल हुने बताए । संघ र प्रदेश निर्वाचन क्षेत्रमा बराबरी सिट बाडफाँड हुने उनको भनाइ छ ।
‘दुई वटा संघिय निर्वाचन क्षेत्रमध्ये एउटा कांग्रेस र अर्काे माओवादीले लिने र चार वटा प्रदेश निर्वाचन क्षेत्र आधा आधा गर्ने भन्ने छ,’ उनले भने, ‘यस बिषयमा जिल्लाका नेताहरुबिच समझदारी भइसकेको छ, अव केन्द्रमा पनि त्यही अनुसार लविङ गर्छौै ।’ कुन क्षेत्र कसले लिने भन्ने बिषयमा भने निर्णय हुन बाँकी रहेको उनले बताए ।
‘त्यो केन्द्रले गर्ने निर्णय हो, हामीले दिएको सल्लाह सुझाव अनुसार केन्द्रले निर्णय गर्छ,’ उनले भने । संघिय निर्वाचन क्षेत्र नम्वर २ कांग्रेसले लिने र क्षेत्र नम्वर १ माओवादीलाई दिने गरी सहमती हुन सक्ने उनको भनाइ छ ।
निर्वाचन क्षेत्र नम्वर २ को संघतर्फ आफ्नो उम्मेदवारी रहने समेत उनले बताए । २०७० र २०७४ सालको चुनावमा बिभिन्न कारणवश आफूले उम्मेदवारी दिन नपाएका भन्दै उनले यसपटक आफ्नो दावी स्वभाविक रहेको बताए ।
‘२०७४ सालको निर्वाचनमा क्षेत्र नम्वर २ मा डा. बाबुराम भट्टराईलाई सहयोग ग¥यौ, हामीले भोट हालेर उहाले जित्नुभयो तर, निर्वाचित भएर गएपछि उहाले कांग्रेस प्रति गरेको व्यवहारले कार्यकर्ताको मन कुडिँएको छ ।
एउटै निर्वाचन क्षेत्रमा पटक पटक अन्य पार्टीलाई भोट हाल्न सक्ने अवस्था नभएकाले पनि यो पटक क्षेत्र नम्वर २ कांग्रेसले लिनुपर्छ भन्ने हो,’ पाण्डेले भने । गठवन्धनका बारेमा नकरात्मक टिकाटिप्पणी नगर्न जिल्लाका कार्यकर्ताहरुलाइ उनले अनुरोध समेत गरेका छन् ।
