१८ भदौ, गोरखा । डा. बाबुराम भट्टराईले गोरखा निर्वाचन क्षेत्र नम्वर २ बाट चुनाव लड्ने घोषणा गरेका छन् । शनिवार गुह जिल्ला गोरखामा पत्रकार भेटघाट गर्दै उनले आगामी मंसिर ४ गते हुने प्रतिनिधिसभा र प्रदेशसभा निर्वाचनमा आफ्नो उम्मेदवारी रहने बताएका हुन् ।
‘गोरखा जिल्ला मेरो पहिले देखिको निर्वाचन क्षेत्र पनि हो,’ उनले भने, ‘फेरी अहिलेसम्म यसअघि जसले जहाँबाट जितेको छ त्यहीबाट चुनाव लड्ने भन्ने गठवन्धनका दलहरु बिच सहमति पनि छ, त्यसैले गोरखा क्षेत्र नम्वर २ स्वतः मेरो भागमा पर्छ ।’ यसको औपचारिक टुङ्गो लाग्न भने बाँकी रहेको उनले जानकारी दिए ।
गठवन्धनमा रहेका दलहरु मिलेर संयुक्त रुपमा चुनाव लड्ने बताउदै उनले भागवण्डा केही दिनमा टुङ्गो लाग्ने जानकारी गराए । यसपटकको चुनावमा गठवन्धनभित्र पनि माओवादी केन्द्रसँग तालमेल गर्ने र हसिया हतौडा चुनाव चिन्ह लिएर निर्वाचन लड्ने उनको भनाइ छ ।
यसपटकको निर्वाचनमा आफूलाई कुनै दल बिशेषको भन्दा पनि सबैको साझा उमेदवारको रुपमा बुझिदिन उनले आग्रह समेत गरेका छन् । गठवन्धनकै अन्य दलहरुले पनि गोरखा क्षेत्र नम्वर २ का लागी उम्मेदवारको नाम सिफारिस गरेर पठाएका छन्, तपाईको सिट सुरक्षित छ त ? भन्ने पत्रकारको प्रश्नमा उनले भने, ‘सिफारिस सबै दलले गर्छन्, त्यो औपचारिक प्रक्रिया हो, तर अन्तमा टुङ्गो लगाउने केन्द्रले हो, केन्द्रमा हामी तालमेल गरेर जाने सहमति भइसकेको छ, त्यही अनुसार निर्णय हुन्छ ।’
गोरखाको एउटा प्रदेश निर्वाचन क्षेत्रमा पनि आफ्नो पार्टीको दावी रहने उनले बताए । तर कुन प्रदेश क्षेत्र भन्ने एकीन भइनसकेको उनले जानकारी दिए ।
‘यसअघि गोरखा क्षेत्र नम्वर २ को ‘क’ प्रदेश क्षेत्र जितेकाले एउटा प्रदेश क्षेत्रमा हाम्रो दावी जायज हो, तर कुन भन्ने अहिले थाहा छैन,’ उनले भने ।
