८ पुष, गोरखा । गोरखा नगरपालिका–६ पदेलीमा क्रियापुत्री घर निर्माण भएको छ । ठुलोआँगनकी स्थानीय समाजसेवी कृष्णदेवी श्रेष्ठको आर्थिक सहयोग र राजुवावु श्रेष्ठको समन्वयमा भवन निर्माण भएको हो ।
सो स्थानमा यसअघि जिर्ण र प्रयोगविहीन अवस्थामा रहेको पाटी थियो । सोही ठाउँमा अहिले पक्की भवन बनाइएको हो । हाल निर्माण भएको भवनको भुइँ तलामा दुई वटा कोठा र माथिल्लो तलामा एउटा हल रहेको भवन निर्माण समिति अध्यक्ष अयोध्या जोशीले बताए । हलमा करिव ५० जना अट्ने उनले जानकारी दिए ।
भवनको कुल लागत १८ लाख ७९ हजार रहेको समिति कोषाध्यक्ष दिपकबाबु श्रेष्ठले बताए । भवन निर्माणाका लागी आवश्यक सबै रकम कृष्णदेवीले सहयोग गरेकी हुन् । भवनको नाम कृष्णदेवी क्रियापुत्री घर राखिएको छ । भवनको शुक्रवार एक कार्यक्रमका बिच आर्थिक सहयोगदाता कृष्णदेवी श्रेष्ठले उद्घाटन गरेकी छन् ।
भवन निर्माण समिति अध्यक्ष जोशीको अध्यक्षता तथा श्रेष्ठको प्रमुख अतिथ्यतामा भएको कार्यक्रममा पुर्व सांसद जीवनप्रेम श्रेष्ठ, वडा नम्वर ६ का अध्यक्ष राजेन्द्र कुमार जोशी, जेष्ठ नागरिक संघ गोरखाका अध्यक्ष मोहनलाल श्रेष्ठ, गोरखा उद्योग वाणिज्य संघका अध्यक्ष कृष्णकुमार श्रेष्ठ, ऐतिहासिक क्षेत्र संरक्षण समितिका अध्यक्ष सुरेशमान श्रेष्ठ, समाजसेवी धिरजबहादुर मास्के लगायतले मन्तव्य राखेका थिए ।
भवन निर्माण भएसँगै मृत्यु संस्कार अन्तरगत काजक्रिया गर्नका लागी ठाउँको समस्या नहुने अपेक्षा गरिएको छ । न्यूनतम शुल्क निर्धारण गरेर भवन संचालनमा ल्याउने तयारी छ । त्यसका लागी क्रियापुत्री भवन संचालन समिति पनि गठन गरिने बताइएको छ ।
