७ फागुन, गोरखा । गोरखामा सातौ गोरखकाली रनिङ कप फुटवल प्रतियोगीता शुरु भएको छ । जिल्लाकै सर्वाधिक राशिको उक्त प्रतियोगीता अन्तरगत आइतवार एक खेल मात्र भएको छ । हरमटारी क्लब ‘ए’ र याङकोट युथ क्लब बिच भएको खेलमा ७–२ को फराकिलो गोल अन्तरले हरमटारी क्लब बिजयी बनेको छ । उक्त खेलमा हरमटारी क्लबका जमिर मास्के ह्याट्रिक गर्दै ‘म्यान अफ द म्याच’ घोषित भएका छन् ।
हरमटारी क्लबको आयोजनामा भएको प्रतियोगीताको उपाधी बिजेता क्लबले २ लाख २२ हजार २२२ नगद पुरस्कार पाउने छ । उपबिजेता क्लबले १ लाख ११ हजार १११ रुपैया र सेमिफाइनलमा पुग्ने दुवै टिमले ५० हजारका दरले नगद पुरस्कार पाउने आयोजक क्लबका अध्यक्ष जीवन गुरुङले बताए । सर्वाेत्कृष्ट खेलाडी, अग्रपंक्ति, मध्यपंक्ति, रक्षक, गोलरक्षक र गोलकर्ताका लागी पनि नगद पुरस्कारको व्यवस्था रहेको उनले जानकारी दिए ।
जिल्ला सदरमुकामको हरमटारी खेलमैदानमा जारी प्रतियोगीतामा जिल्लाभित्र र बाहिरका गरी कुल १२ टिमको सहभागीता रहेको छ । प्रतियोगीताको आइतवार प्रतिनिधि सभा सदस्य राजेन्द्र बजगाईले उद्घाटन गरेका हुन् ।
कार्यक्रममा गण्डकी प्रदेश सभा सदस्य नन्द प्रसाद न्यौपाने, आरुघाट गाउँपालिका अध्यक्ष राजु गुरुङ, प्रमुख जिल्ला अधिकारी दिनेशसागर भुसाल, पत्रकार महासंघ गोरखाका अध्यक्ष नरहरी सापकोटा लगायतले मन्तव्य राखेका थिए । प्रतियोगीता फागुन १४ गतेसम्म चल्ने छ ।
