१९ चैत्र, गोरखा । आर्थिक अभावका कारण घर निर्माण कार्यलाई पूर्णता दिन नसकेका गोरखा नगरपालिका–११ सोह्र किलोका गोकर्ण भुजेललाई बिभिन्न संघसंस्था र व्यक्तिहरुले सहयोग गरेका छन् । शनिवार एक कार्यक्रमका बिच भुजेललाई ५० हजार बराबरको सामग्री सहयोग गरिएको हो ।
घरको झ्याल ढोकाका लागी लायन्स क्लब अफ गोरखा तारानगरले ३० हजार नगद सहयोग गरेको छ । क्लबका संस्थापक अध्यक्ष सुरेन लामिछाने, हालका अध्यक्ष यम बसेल र सन्तोष सिंखडा र रेन थापाले व्यक्तिगत रुपमा दश हजार नगद सहयोग समेत गरेका छन् ।
त्यस्तै लायन्स क्लब इन्टरनेशनल ३२५ जे नेपालका बर्ष २०२३÷२४ का गभर्नर हरि मरहट्टाले ५ सय लिटर क्षमताको पानी ट्यांक सहयोग गरेका छन् । नेपाल रेडक्रस सोसाइटी गोरखा शाखाले आवश्यक भाडाकुडा सहयोग गरेको छ ।
क्लबका अध्यक्ष बसेलको अध्यक्षता तथा वडाध्यक्ष राम बहादुर खड्काको प्रमुख अतिथ्यतामा भएको कार्यक्रममा रेडक्रस गोरखाका सभापति यदु विलास भट्टराई, क्लबका संस्थापक अध्यक्ष सुरेन लामिछाने, समाजसेवी उदयनन्द सिंखडा लगायतको सहभागीता रहेको थियो ।
कार्यक्रममा बोल्दै वडाध्यक्ष खड्काले भुजेललाई शौचालयमा आवश्यक सामाग्री सहयोग गर्ने आश्वासन दिएका छन् ।
