गोरखा नगरपालिकाका मेयर कृष्ण रानाका स्वकीय सचिव अनिस अर्याल (ज्याक) को विवादास्पद गतिविधिले नगरपालिकामा आन्तरिक किचलो शुरु भएको छ । कर्तव्य र जिम्मेवारी भुलेर अर्यालले गर्ने गरेका गतिविधि सधै विवादास्पद बन्ने गरेको छ । पछिल्लो समय बैशाख १२ मा शिक्षा शाखाभित्र उनले गरेको हर्कत मेयर रानाले समेत थामथुम पार्न नसक्दा कार्यपालिका सदस्य बिवादित बनेका छन् ।
करार सेवामा शिक्षक नियुक्तीका लागी परिक्षा संचालनको प्रक्रियामा शाखाभित्र पसी अर्यालले शिक्षा शाखा प्रमुख चन्द्र बहादुर खड्कालाई गालीगलौज गर्दै अभद्र व्यवहार गरेका थिए । आफूले चाहेको व्यक्ति परिक्षामा अनुर्तिण भएको भन्दै परिक्षा सम्बन्धी कागजातहरु नष्ट गर्ने दुष्प्रयास गरेपछि बाहिर निकाल्न कर्मचारीलाई हम्मे हम्मे परेको थियो । कर्मचारमाथि अभद्र व्यवहार भएपछि ४६ जना कर्मचारीले अर्याललाई पदबाट हटाउन बैशाख १४ गते प्रमुख प्रशासकीय अधिकृत मार्फत माग पत्र पेश गरेका थिए ।
विवाद सतहमा आएपनि स्वकीय सचिवको हर्कतबारे मेयर रानाले कर्मचारीसँग छलफल समेत गर्न चाहेनन् । विवाद नसुल्झिएपछि उपप्रमुख मसली माया थोकर सहित बहुमत कार्यपालिका सदस्यले कार्यपालिका बैठक राख्न पटक पटक माग गरे । कार्यपालिका बैठक बोलाउन मेयरले अटेर गरेपछि बैशाख २१ गते कार्यपालिका सदस्यहरु छलफलका लागी मेयरको कार्यकक्षमा पुगेका थिए । तर मेयर रानाले विवाद सुल्झाउने आश्वासन समेत दिन सकेनन् । उल्टै स्वकीय सचिव पार्टीले खटाएको व्यक्ति भएकाले पार्टी नै जिम्मेवार हुने जवाफ दिए । कर्मचारी बिषयमा कुनै छलफल नहुने भन्दै स्वकीय सचिव अर्यालको ढाकछोप गरे ।
अर्याल यसअघि पनि बिभिन्न घटनामा विवादमा मुछिदै आएका छन् । जनयुद्ध दिवसको सन्दर्भमा द्रव्यशाह बहुमुखी क्याम्पसका प्रमुख रामचन्द्र दवाडीले दिएको अभिव्यक्तिलाई लिएर उनीमाथि भएको दुव्र्यवहारको घटनामा समेत अर्यालको संलग्नता थियो । राजनीतिक रुप दिइएको उक्त घटनामा अर्याल कारवाहीको भागेदार नभएपछि थप प्रश्रय पाए ।
राजनीतिक संरक्षणले मनोवल उच्च बनेका अर्याललका विवादास्पद गतिविधि रोकिएका छैनन् । उनले गोरखा नगरपालिकाको सरकारी मोटरसाइकल दुरुपयोग गरेकोबारे नगरपालिकाभित्रै चर्चा हुने गरेको छ । बिभिन्न शाखामा पस्ने, आफू अनुकुल काम गर्न कर्मचारीलाई थर्काउने जस्ता गतिविधिले पनि उनी थप विवादीत छन् ।
पदीय अधिकार तथा मर्यादा विपरित पटक पटक यस्ता हर्कत गर्दा नगरपालिकाकै बदनामी भएको कार्यपालिका सदस्यहरु बताउछन् । अर्यालको करार सम्झौता खारेज गर्नुपर्ने उनीहरुको माग छ । नगर प्रमुख राना भने सामान्य बिषयलाई ठुलो बनाइएको बताउछन् । ‘परिक्षामा १५ जना सहभागी भएकोमा १४ जना फेल भएर एक जनामात्र पास भएपछि किन त्यसो भयो भनेर कुरा उठाएको हो, यसलाई इस्यु बनाउने कुरा गलत हो,’ उनले भने ।
