फागुन १९, गोरखा । गत आर्थिक बर्ष २०७९|८० को कार्यसम्पादन मूल्याकंनमा गोरखाका स्थानीय तहमध्ये आरुघाट गाउँपालिका उत्कृष्ट भएको छ । राष्ट्रिय प्राकृतिक स्रोत तथा वित्त आयोगले बुधबार सार्वजनिक गरेको प्रारम्भिक नतिजा अनुसार ४८.९५ अंक प्राप्त गरी जिल्लाको पालिकामध्ये आरुघाट पहिलो बनेको हो ।
मूल्याकंनमा भीमसेन थापा गाउँपालिका दोस्रो बनेको छ । उक्त पालिकाले ४४.५५ अंक प्राप्त गरेको आयोगले जनाएको छ । ४३.५४ अंक प्राप्त गर्दै बारपाक सुलिकोट गाउँपालिका तेस्रो बनेको छ । आयोगले सार्वजनिक गरेको नतिजा अनुसार सिरानचोक गाउँपालिकाले ४३.४०, अजिरकोट गाउँपालिकाले ४२.९१, पालुङटार नगरपालिकाले ४०.६० र शहीद लखन गाउँपालिकाले ४०.३७ अकं प्राप्त गरेको छ ।
त्यस्तै गण्डकी गाउँपालिकाले ३८.४५, चुमनुव्री गाउँपालिकाले ३७.०८, गोरखा नगरपालिकाले २८.६३ र धार्चे गाउँपालिकाले २८.११ अंक प्राप्त गरेका छन् । कार्यसम्पादन मूल्याकंनमा कम अंक प्राप्त गर्नेमा धार्चे गाउँपालिका र गोरखा नगरपालिका रहेका छन् ।
आयोगले प्रदेश तथा स्थानीय तहको कार्यसम्पादन मूल्यांकन कार्यविधि २०७८ अनुसार विभिन्न १७ सूचकको आधारमा मूल्यांकन गरेको छ । जसमा असार १० भित्र बजेट पेश गरे–नगरेको, असार मसान्त भित्र बजेट पारित गरे–नगरेको, आय व्ययको प्रक्षेपण पुस मसान्तभित्र अर्थ मन्त्रालयमा पेश गरे–नगरेको, बजेटको वर्षिक समिक्षा गरी कार्तिक मसान्तभित्र सार्वजनिक गरे–नगरेको, विनियोजित रकम अनुसार खर्चको व्यवस्था, बेरुजुको अवस्था स्थानीय सञ्चित कोष व्यवस्थापन प्रणाली (सूत्र)को प्रयोग गरे–नगरेको जस्ता सूचकहरुका आधारमा मुल्यांकन गरिएको छ ।
त्यस्तै, आवधिक योजना तर्जुमा गरे–नगरेको, कक्षा १ देखि ८ सम्म खुद विद्यार्थी भर्ना दर, कक्षा–८ को तुलनामा कक्षा–९ मा विद्यार्थी टिकाउ दर, सामुदायिक विद्यालयबाट कक्षा १० मा १.६ भन्दा वा सो भन्दा उच्च जीपीए प्राप्त गरेका विद्यार्थी प्रतिशत, ४ पटक गर्भजाँच गरेका महिलाको अनुपात, कुल गर्भवतीमध्ये स्वास्थ्य संस्थामा सुत्केरी हुने महिलाको अनुपात, पूर्ण खोप पाएका बालबालिकाको अनुपात लगायतका सूचकहरु रहेका छन् ।
स्थानीय तहलाई संघीय संचित कोष तथा प्रदेश संचित कोषबाट प्रदान गर्ने वित्तीय समानीकरण अुनदान अन्तर्गत कार्यसम्पादन मूल्यांकनका आधारमा अनुदान सिफारिसको लागि आयोगले कार्यसम्पादन मूल्यांकन गर्ने आयोगले जनाएको छ । आयोगका अनुसार वित्त आयोगले वित्तीय अनुदान दिँदा स्थानीय तहको कार्यसम्पादनलाई पनि हेरेर सिफारिस गर्नको लागि कार्यसम्पादन मूल्याकंन हेर्ने गरिन्छ ।
कार्यसम्पादन मूल्यांकन गर्दा आयोगले स्थानीय तहसँग तथ्यांकहरु मागेर त्यसको आधारमा र उपलब्ध तथ्य सही वा गलत भएको प्रामाणित गरेर सोही आधारमा अंक प्रदान गर्छ ।
प्राप्त अंकमा चित्त नबुझे सात दिनभित्र निवदेन दिन आयोगले स्थानीय तहहरुलाई आग्रह समेत गरेको छ ।
