तारानगर स्वास्थ्य चौकीलाई आधारभूत अस्पतालको रुपमा स्तरोन्नती गरिने, नगरभित्रका गर्भवती, सुत्केरी, अति विपन्न, असहाय जेष्ठ नागरिक र अपाङ्गता भएका व्यक्तिहरुलाई गोरखा अस्पतालसम्म निशुल्क एम्वुलेन्स सेवा उपलब्ध गराइने र रिफर भएका सुत्केरीलाई काठमाडौं, भरतपुर, पोखरासम्म निशुल्क एम्वुलेन्स सेवालाई निरन्तरता दिने नीति नगरले ल्याएको छ । नगरपालिका आफैले शव वहानको व्यवस्था गर्ने भनिएको छ ।

‘एक खेत एक व्यवस्थित मुहान’ सहितको सिंचाई कुलो निर्माणको नीति नगरले लिएको छ । व्यवसायिक खेति गर्न चाहने किसानलाई जग्गा भाडामा अनुदानको व्यवस्था गरिने र बाँदर नियन्त्रणको लागि बिशेष योजना संचालन गरिने बताइएको छ । हलगोरु पाल्ने किसानलाई प्रोत्साहन गर्दै रासायनिक मलको डिपो संचालनका लागि आवश्यक पहल गरिने नगर प्रमुख मगरले बताए । उनका अनुसार खोलखोलेदेखि पुरानो बसपार्कसम्मको बजार क्षेत्रमा सडक चौडा गरि दायावाया नाला सहितको स्तरीय फुटपाथ निर्माण गरिने छ ।

खोलखोले क्षेत्रको सार्वजनिक जग्गा प्रयोग गरि टुरिष्ट बसपार्क निर्माण गर्ने, वडा नम्वर ६ र ८ को सिमाना धनुवासेमा घ्याम्पेसाल आरुघाट बस पार्किङ स्थल निर्माण गर्ने र ठिगुरेस्वाँरामा ल्याण्डपुलिङ सहितको व्यवस्थित बसपार्क निर्माणका लागि सम्भाव्यता अध्ययन गरि निर्माण कार्यको थालनी गर्ने नगरको नीति छ ।

खादा प्रयोगमा बन्देज गरि स्थानीय फुलको प्रयोगलाई बढवा दिने नीतिले आगामी बर्ष पनि निरन्तरता पाउने भएको छ । प्लाष्टिकका झोलाको प्रयोगमा पनि बन्देज लगाइने भएको छ । कपडाको झोला प्रयोग गर्ने बानीको बिकास गरिने बताइएको छ । रामशाह घाटमा नगरवासी परिवारको मृतकको शव तथा असाहाय वेवारिसे शव दहनको लागि आवश्यक दाउरा निशुल्क उपलब्ध गराउने कार्यले आगामी बर्ष पनि निरन्तरता पाउने नगर प्रमुख मगरले बताए ।