उत्तरी गोरखाको धार्चे गाउँपालिकामा पाँच शैयाको आधारभूत अस्पताल निर्माण भएको छ । देशभरका सबै पालिकामा आधारभूत अस्पताल बनाउने सरकारको योजना अनुरुप वडा नम्वर ३ खोर्लावेशीमा अस्पताल निर्माण भएको हो ।
स्वीजरल्याण्डको अर्थ सी एयर नामक संस्था र पालिकाको साझेदारीमा अस्पताल भवन निर्माण भएको प्रमुख प्रशासकीय अधिकृत काजिमान सुनारले बताए । ‘उक्त संस्थाको ६० प्रतिशत र पालिकाको ४० प्रतिशत लागत सहभागीतामा अस्पताल बनेको हो,’ उनले भने, ‘कुल लागत दुई करोड २८ लाख हो ।’ भवनमा पाँच वटा ब्लक रहेको उनले जानकारी दिए ।
अस्पताल निर्माणका लागि २०७६ साल असोज १२ गते छाया नेपाल र पालिकाबीच सम्झौता भएको थियो । पालिकाका अनुसार भवन निर्माण कार्य गत बर्ष सम्पन्न भएको हो । ‘भवन बनेपनि अस्पतालका लागि आवश्यक उपकरण खरिद र जडान गर्ने काम बाँकी थियो, त्यो काम यो बर्ष सम्पन्न भयो,’ सुनारले भने ।
अस्पतालको वुधवार एक कार्यक्रमकाबीच उद्घाटन गरिएको छ । गण्डकी प्रदेश सांसद शुशिला सिंखडा र पालिका अध्यक्ष लक्ष्मण गुरुङले संयुक्त रुपमा अस्पतालको उद्घाटन गरेका हुन् ।
सो अस्पतालमा २४ घण्टा इमरजेन्सी सेवा, सामान्य चिकित्सा सेवा, ओपिडी सेवा, प्रसुति सेवा, ल्याव सेवा, भ्याक्सिनेसन सेवा, दन्त सेवा, इसिजी, एक्स–रे, भिडियो एक्स–रे, फार्मेसी सेवा उपलब्ध हुने बताइएको छ । पोष्टमार्टम र शव परीक्षण सेवाहरू पनि उपलब्ध हुने पालिकाले जनाएको छ ।
पालिकाका अनुसार अस्पतालको जनशक्तिको रुपमा हाल दुई जना मेडिकल अफिसर, तीन जना स्टाफ नर्स, तीन जना हेल्थ असिस्टेन्ट, एक जना रेडियोग्राफर, एक जना फार्मेसी एसिस्टेन्ट, एक जना ल्याव टेक्निसियन, एक जना डेन्टल हाइजिनिक र चार जना कार्यालय सहयोगी रहेका छन् ।
आधारभूत अस्पताल निर्माण भएसँगै अहिले धार्चेसँगै चुमनुव्रीका स्थानीयलाई पनि स्वास्थ्य सेवा लिन निकै सहज हुने अपेक्षा गरिएको छ । ‘यसअघि हाम्रो पालिकामा स्वास्थ्य चौकी र सामुदायिक स्वास्थ्य इकाइबाट आधारभूत स्वास्थ्य सेवा उपलब्ध हुदैँ आएको थियो । त्यो बाहेकको अन्य उपचारका लागि आरुघाट की गोरखा बजार जानुपर्ने बाध्यता थियो,’ उनले भने, ‘अव त्यो बाध्यता पनि हट्यो ।’
अस्पतालको क्षेत्रफल ९ रोपनी ९ आना रहेको उनले जानकारी दिए ।
