बारपाक सुलिकोट गाउँपालिकाले रैथाने वाली प्रवद्र्धनमा बिशेष जोड दिएको छ । प्रवद्र्धनका लागि बिभिन्न कार्यक्रम संचालन गर्दै आएको पालिकाले जनाएको छ ।
पालिकाभित्रका सबै सामुदायिक बिद्यालयमा मैदा र मैदाजन्य खानेकुरालाई पूर्ण रुपमा निषेध गरिएको प्रमुख प्रशासकीय अधिकृत सुवास आलेले बताए । ‘गत शैक्षिक सत्रबाटै मैदाबाट बनेको मम, चाउमिन, चाउचाउ जस्ता खानेकुरा र जंक फुड (पत्रु खाना) पूर्ण रुपमा निषेध गरेका हौ,’ उनले भने, ‘त्यसको ठाउँमा रैथाने वालीबाट बनेका परिकारलाई जोड दिएका छौ ।’ कोदो, मकै र फापरबाट बनेका परिकारलाई प्राथमिकता दिइएको उनले जानकारी दिए ।
‘बिद्यार्थीलाई खाजाको रुपमा मकै र फापरबाट बनेको खिर, पाउरोटी, केक लगायतका बिभिन्न परिकार खुवाउन भनेका छौ, स्थानीयलाई ती परिकार बनाउने तालिम पनि दिइसक्यौ,’ उनले भने । बाल कक्षाका बालबालिकालाई सातु, लिटो र जाउलो खुवाउन भनिएको उनले बताए । अन्यको हकमा गेडागुडी, मकै भटमास, स्थानीय स्तरमा उत्पादित कुखुराको अण्डा र स्थानीय स्तरमा उत्पादित फलफुल लगायतका पौष्टिक आहार पाइने खाजा खुवाउन भनिएको उनले जानकारी दिए ।
होम स्टे र होटल व्यवसायीलाई लक्षित गरी बारपाकमा कोदोका बिभिन्न परिकार बनाउने तालिम समेत संचालन गरिएको उनको भनाइ छ । उनका अनुसार तालिममा कोदोको मम, पाउरोटी, बिस्कुट लगायत १५ थरिका परिकार बनाउने तालिम दिइएको हो ।
रैथाने वाली प्रवद्र्धनका लागि सबै वालिमा बिउ र सिंचाइमा अनुदान उपलब्ध गराइएको पालिकाले जनाएको छ । यो बर्ष उन्नत जातको गहुँको विउ अनुदानमा वितरण गरिएको प्रमुख प्रशासकीय अधिकृत आलेले बताए । रैथाने वाली प्रवद्र्धनसँगै बिद्यार्थीको पोषण सुधारमा पनि सहयोग पुग्ने अपेक्षा पालिकाको छ ।
