हिमाली क्षेत्रका स्थानीयको जीवन रक्षाको माग गर्दै मनास्लु बेस क्याम्पमा आमरण अनसन सुरु भएको छ । उत्तरी गोरखाको चुमनुव्री गाउँपालिका–१ सामागाउँ बस्ने धावा नुर्वु लामा नेतृत्वको दश जना टोलि शुक्रवारबाट समुद्री सतहबाट करिव ४ हजार ८ सय मिटर उचाइमा अनसन बसेका हुन् ।
जलवायु परिवर्तनका कारण हिमतालहरु फुट्ने जोखिम बढेकाले बेलैमा त्यसतर्फ उचित कदम चाल्न सरकारलाई उनीहरुले सचेत गराएका छन् । उत्तरी गोरखास्थित बिरेन्द्रताल (सामागाउँ), कालताल (प्रोक), हरियो ताल (पुगेन) लगायतका जोखिमयुक्त हिमतालहरुको मापन गरि भविष्यमा हुनसक्ने बिष्फोटको जोखिम अध्ययन गर्न उनीहरुले सरकारलाई आग्रह गरेका छन् ।
‘सन् २०२६ र २०२७ मा विश्वव्यापी तापक्रम बृद्धि भई हिमनदीहरुलाई तिव्र रुपले पगाल्ने छ र यसको असर ताल तथा नदीहरुमा देखिन्छ,’ लामाले भने, ‘सन् २०२७ मा यसको असर बढी हुने र यही कारणले कहिले अत्याधिक बर्षा त कहिले सुख्खा तथा तापक्रम बढ्ने हुदाँ विपदको पूर्व तयारी र न्यूनिकरणका उपायबारे नेपाली जनतालाई सुसुचित गराउन आवश्यक छ ।’ नेपालको मानव वस्ती नजिकै रहेको चीनतर्फको हिमतालहरुको दुवै देशका संयन्त्रहरुले संयुक्त अनुगमन गर्ने व्यवस्था मिलाउनुपर्ने उनले बताए ।
विपदको पुर्व सूचना दिने गरी ठाउँठाउँमा साइरन जडान गर्नुपर्ने उनको माग छ ।
मनास्लु क्षेत्र र चुम उपत्यकामा रहेको हिमतालहरुको हवाई अनुगमन गर्न समेत उनले सरकारसमक्ष माग गरेका छन् । विश्वव्यापी वातावरणीय प्रभाव फैलाउने बिकसित राष्ट्रहरुबाट नेपालले पाउनुपर्नै क्षतिपूर्ति र न्यायका लागि जोडदार पहल गर्न सरकारलाई उनले आग्रह समेत गरेका छन् । प्रत्येक हिमाली क्षेत्रका सामुदायिक बिद्यालयहरुको पाठ्यक्रममा जलवायु परिवर्तनको असरसम्बन्धी बिषय समावेश गर्न समेत उनीहरुको माग राखेका छन् ।
माग पूरा नभएसम्म अनसन नतोड्ने उनीहरुको अडान छ ।
