३१ बैशाख, गोरखा । गोरखाको एघारमध्ये सात स्थानीय तहमा मतगणना शुरु भएको छ । गोरखा र पालुङटार नगरपालिका, गण्डकी, बारपाक सुलिकोट, अजिरकोट, शहिद लखन र भीमसेन थापा गाउँपालिकामा मतगणना शुरु भएको सम्बन्धित पालिकाका निर्वाचन अधिकृतहरुले जानकारी दिएका छन् ।
सामान्य विवादका कारण धार्चे गाउँपालिकाको मतगणना शुरु गर्न नसकिएको निर्वाचन अधिकृत निराज कुमार खत्रीले बताए । ‘सबै मतदान केन्द्रबाट मतपेटिका आइसक्यो, बिहान सर्वदलिय बैठक पनि बस्यौ,’ उनले भने, ‘तर सामान्य विवाद भएकाले मतगणना शुरु गर्न सकेका छैनौ ।’
विवादको बिषय भने उनले खोल्न चाहेनन् । सिरानचोक र आरुघाट गाउँपालिकामा मतगणनाको लागी सर्वदलिय बैठक बसिरहेको बताइएको छ । चुमनुव्री गाउँपालिकामा भने मतगणना स्थलमा मतपेटिका ल्याउने काम भइरहेको निर्वाचन अधिकृत नानीवावु पोखरेलले बताए ।
‘भौगोलिक बिकटताका कारण मान्छेले बोकाएर मतपेटिका ल्याउनुपर्ने बाध्यता छ,’ उनले भने, ‘सबै ठाउँबाट मतपेटिका ल्याउदै हुुनुहुन्छ, दुई दिनसम्ममा आइपुग्छ की भन्ने अनुमान हो ।’ कडा सुरक्षाका बिच मतपेटिका मतगणना स्थलमा ल्याउने काम भइरहेको प्रमुख जिल्ला अधिकारी शंकरहरी आचार्यले बताए ।
उनका अनुसार नेपाली सेना, शसस्त्र प्रहरी र जनपथ प्रहरी खटाइएको छ ।
