३ जेठ, गोरखा । गोरखाको धार्चे गाउँपालिकामा नेपाली कांग्रेसले लज्जास्पद हार व्यहोरेको छ । २०७४ सालको स्थानीय तह निर्वाचनमा गाउँपालिका अध्यक्ष उपाध्यक्ष सहित तीन वटा वडा जितेको कांग्रेस यसपटक भने सबै पदमा पराजित बन्यो ।
यसअघिको स्थानीय तह निर्वाचनमा गाउँपालिका अध्यक्ष जितेका नेपाली कांग्रेसका सन्त बहादुर गुरुङ यो पटक भने भारी मत अन्तरले पछि परे । उनलाई १ हजार ८२५ मत अन्तरले पछाडी पार्दै माओवादी केन्द्रका उम्मेदवार लक्ष्मण गुरुङ बिजयी बने ।
त्यस्तै उपाध्यक्षमा कांग्रेसकी उम्मेदवार फुलमाया गुरुङ पनि यसपटक पराजित भइन् । माओवादी केन्द्रकी उम्मेदवार सुनिला गुरुङले उनलाई १ हजार ८०३ को फराकिलो मत अन्तरले पराजित गरेकी हुन् ।
यसअघिको स्थानीय तह निर्वाचनमा उक्त पालिकाको सातमध्ये तीन वटा वडा कांग्रेसले जितेको थियो ।
तर उक्त वडाहरुमा पनि यसपटक कांग्रेस पराजित बनेको छ ।
