८ जेठ, गोरखा । गण्डकी गाउँपालिकाको प्रशासकीय भवन सहित वडा नम्वर ६ र ८ को भवन निर्माणका लागी आब्हान गरिएको ठेक्का रद्ध गरिएको छ । आइतवार राष्ट्रिय दैनिक पत्रिकामा सूचना प्रकाशित गर्दै गाउँपालिकाको कार्यालयले उक्त ठेक्का रद्ध गरिएको जानकारी गराएको हो ।
गत बैशाख ९ गते गाउँपालिकाले ई–बिडिङ मार्फत ठेक्का आव्हान गरेको थियो । तर नवनिर्वाचित जनप्रतिनिधी आएसँगै उक्त ठेक्का रद्ध गरिएको छ । गाउँपालिकाको कार्यालयले यही जेठ ६ गते ठेक्का रद्ध गर्ने निर्णय गरेको प्रमुख प्रशासकीय अधिकृत बेदहरी अधिकारीले बताए ।
‘पहिलेको जनप्रतिनिधी हुदाँ ठेक्का आब्हान भएको थियो,’ उनले भने, ‘बैशाख ३० गतेको चुनावबाट निर्वाचित भएर आउनुभएका अध्यक्षले अहिलेलाई यो ठेक्का रद्ध गर्ने भन्नुभयो, त्यही अनुसार निर्णय गरेका हौ ।’ आर्थिक स्रोत व्यवस्थापनको ग्यारेन्टी नभएका कारण ठेक्का तत्कालका लागी स्थगित गर्ने निर्णय भएको उनले जानकारी दिए ।
‘भवन निर्माणका लागी करिव १२ करोडको टेण्डर आब्हान गरेका थियौ, तर यस बर्ष गाउँपालिकाले ३ करोड ८५ लाख रकम मात्र छुट्याएको छ, बाँकी रकम ग्यारेन्टी नभएकाले तत्काललाई ठेक्का रद्ध गर्न अध्यक्षले भनेपछि रोकेका हौ,’ उनले भने ।
आवश्यक छलफल र समन्वय गरेर रकमको स्रोत सुनिश्चित गरेपछि मात्र भवन ठेण्डर प्रक्रिया अगाडी बढाउने तयारी भएको उनले जानकारी दिए ।
