१२ जेठ, गोरखा । गोरखाको धार्चे गाउँपालिका वडा नम्वर ३ मा घाइते अवस्थामा भेटिएको घोरलको उद्धार गरिएको छ । बिहीवार उद्धार भएको उक्त घोरललाई सव डिभिजन वन कार्यालय माछाखोलामा राखेर उपचार भइरहेको डिभिजन वन कार्यालय गोरखाले जनाएको छ ।
केही दिनअघि मात्र कार्यालयले बिभिन्न ठाउँबाट घाइते वन्यजन्तुको उद्धार गरेको थियो । शहिद लखन गाउँपालिका–३ बनौती पाखा सामुदायिक वनबाट बयस्क पोथी मयुर, पालुङटार नगरपालिका–२ ढलेबरबाट वयस्क रतुवा मृग र गोरखा नगरपालिका–७ हिलेपोखरीबाट चरी बाघको उद्धार गरिएको कार्यालयका सूचना अधिकारी महेश पौडेलले बताए ।
चरी बाघ र मयुरको उपचार पश्चात प्रकृती संरक्षण कोष चितवनमा पठाइएको र रतुवा मृगको भने कार्यालयमा उपचार भइरहेको उनले जानकारी दिए । मृत अवस्थामा फेला परेका वन्यजन्तुको पनि उचित व्यवस्थापन गर्दै आएको कार्यालयले जनाएको छ । ‘सिमित स्रोतसाधन र जनशक्ति भएपनि हामीले उचित व्यवस्थापन गर्दै आएका छौ,’ कार्यालयका सूचना अधिकारी पौडेलले भने ।
मृत अवस्थामा फेला परेका वन्यजन्तुलाई प्रहरी र स्थानीयको समन्वयमा कार्यालय परिसरमा खाडल खनेर पुर्ने गरिएको उनले बताए । अंगहरु चोरी शिकारी नहोस् भन्ने उदेश्यले मृत फेला परेका वन्यजन्तुलाई उचित व्यवस्थापन गर्ने गरिएको उनले जानकारी दिए ।
चालु आर्थिक बर्षको हालसम्म कार्यालयले १५ वटा भन्दा बढी वन्यजन्तुको उद्धार तथा व्यवस्थापन गरिसकेको उनले बताए ।
