१७ जेठ, गोरखा । काठमाण्डौबाट हराएको मोटरसाइकल गोरखामा फेला परेको छ । बा ०२–०१८ प ८२४७ नम्वरको २ सय ८५ सिसीको केटिएम डुक बाइक गोरखा नगरपालिका–१० सिर्दिपुलमा भेटिएको जिल्ला ट्राफिक प्रहरी कार्यालय गोरखाले जनाएको छ ।
२०७७ साल फागुन २१ गते ललितपुर महानगरपालिकाको कुमारीपाटीबाट उक्त बाइक हराएको थियो । ‘चोरी गर्नेले बाइकको नम्वर प्लेट पनि चेन्ज गरेको रहेछ,’ जिल्ला ट्राफिक इन्चार्ज प्रेम प्रकाश पोखरेलले भने, ‘तर इन्जिनको च्यासिस नम्वरबाट हामीले पत्ता लगायौ ।’
गत बैशाख २४ गते फेला परेको उक्त बाइक सोमवार सम्बन्धित धनीलाई बुझाइएको उनले बताए । भुवन ताङनामीले किनेको उक्त बाइक काठमाण्डौको एमएलजी इन्स्यूरेन्सका प्रतिनिधी हेमन्त ढकाललाई जिम्मा लगाइएको छ ।
बाइक धनीले हराएको भन्दै इन्स्यूरेन्सबाट भुक्तानी लगिसकेकाले इन्स्यूरेन्स कम्पनीलाई जिम्मा लगाइएको जिल्ला ट्राफिक इन्चार्ज पोखरेलले जानकारी दिए ।
