२४ जेठ, गोरखा । गण्डकी गाउँपालिकाको मंगलवारको गाउँसभा नेपाली कांग्रेस र नेकपा एमालेका निर्वाचित जनप्रतिनिधीले बहिष्कार गरेका छन् । गाउँपालिकाको केन्द्र वडा नम्वर ६ आइडाडामा राख्ने प्रस्ताव पेश गर्ने तयारी भएको जानकारी पाएपछि वैठक बहिष्कार गरेको गाउँपालिका उपाध्यक्ष ललिता अधिकारीले बताइन् । उनी नेपाली कांग्रेसबाट निर्वाचित भएकी हुन् ।
‘यही जेठ १६ गते गाउँकार्यपालिकाको बैठकमा गाउँपालिकाको केन्द्र आइडाडा सार्ने भनेर प्रस्ताव लाने निर्णय गरे,’ उनले भनिन्, ‘हामीले वडा नम्वर ५ को लाकुरी भन्ज्याङ वा वडा नम्वर ६ को दलभन्ज्याङ गरौ भन्दापनि माओवादीका जनप्रतिनिधीहरु मान्नुभएन ।’ मंगलवारको गाउँसभामा केन्द्रबारे जवरजस्ती निर्णय गराउने मनसाय बुझिएपछि बैठकमा सहभागी नभएको उनले बताइन् ।
गाउँपालिका अध्यक्ष दिपक तिमिल्सिनाले गाउँपालिका केन्द्रको बिषयमा असहमति जनाउदै कांग्रेस र एमालेका जनप्रतिनिधीहरु बैठकमा सहभागी नभएको स्वीकार गरे । ‘वडा नम्वर ६ को वनटारमा पालिकाको केन्द्र हुनुपर्छ भन्ने हाम्रो माओवादी पार्टीको माग हो,’ उनले भने, ‘हामी आइडाँडासम्म सहमति हुन सक्थ्यौ तर कांग्रेसले भूम्लिचोक नै हुनुपर्छ भन्ने अडान लिइरहेको छ ।’
आवश्यक छलफल र समन्वय गरेर केन्द्रको विवाद टुंग्याउने नभए सेवा केन्द्रहरु स्थापना गरेर काम सुचारु गर्ने उनले बताए ।
भूम्लिचोकको ओखलडाडामा निर्माण हुने गरी अघिल्लो कार्यकालका जनप्रतिनिधीले आव्हान गरेको गाउँपालिकाको प्रशासकीय भवनको ठेक्का पनि नवनिर्वाचित अध्यक्ष तिमिल्सिनाले रद्ध गरिदिएका छन् ।
निर्वाचित भएको भोलीपल्टै उनले प्रशासकीय र दुई वटा वडा कार्यालयको भवनको ठेक्का रद्ध गरेका हुन् । उक्त गाउँपालिकाको कार्यपालिकामा माओवादी केन्द्रको बहुमत छ । ४४ जनाको गाउँसभामा माओवादी केन्द्रका २९, कांग्रेसका १३ र एमालेका दुई सदस्य छन् ।
