३१ जेठ, गोरखा । विपदको पूर्व तयारीमा जुट्न भन्दै जिल्लाका सम्बन्धित निकायहरुलाइ सजग गराइएको छ । मंगलवार बसेको जिल्ला विपद व्यवस्थापन समिति बैठकले विपदबाट हुने क्षति न्यूनिकरणका लागी सबैले आवश्यक समन्वय गरी कार्यक्रम संचालन गर्न आग्रह गरेको छ ।
उद्धार सामग्री सहित तालिम प्राप्त सुरक्षाकर्मी टोली तयारी अवस्थामा राख्न सुरक्षा निकायलाई निर्देशन गरिएको समिति संयोजक एवं प्रमुख जिल्ला अधिकारी शंकरहरी आचार्यले बताए । गैर खाद्य सामग्री तयारी अवस्थामा राख्न नेपाल रेडक्रस सोसाइटी गोरखा शाखालाई भनिएको उनले जानकारी दिए ।
पालिकाहरुमा रहेको उपशाखामा समेत उक्त सामग्री मौज्दात अवस्थामा राख्न निर्देशन गरिएको उनको भनाइ छ । मनसुनको समयमा पहिरोका कारण सडकहरु अवरुद्ध भएमा तत्काल सुचारु हुने वातावरण मिलाउन सम्बन्धित कार्यालयहरुलाई समितिले निर्देशन दिएको छ ।
विपदको समयमा टेलिफोन, बिद्युत, खानेपानी जस्ता अतिआवश्यक सेवाहरु अवरुद्ध हुन सक्ने भएकाले समाधानका लागी आवश्यक व्यवस्था मिलाउन समेत सम्बन्धित कार्यालयहरुलाई भनिएको छ । जिल्लालाई आवश्यक पर्ने खाद्यान्न लगायत अन्य अत्यावश्यक सामग्रीको मौज्दात राख्न र मूल्यबृद्धि हुन नदिन उपयुक्त सजगता अपनाउन व्यवसायी तथा उनीहरु आवद्ध संघसंस्थालाई भनिएको छ ।
पालिकाहरुलाइ आ–आफ्नो क्षेत्रमा रहेको व्यक्तिको घरजग्गा, अन्नवाली, पशुपंक्षी लगायत तरकारी तथा फलफूल खेतीको बिमा कार्यक्रमलाई अग्राधिकार दिन भनिएको प्रजिअ आचार्यले बताए ।
बैठकले मनसुनलाई लक्षित गरी रेडक्रसले तयार पारेको मनसुन सम्बन्धी आपतकालिन कार्य योजना स्वीकृत गरी लागू गर्ने निर्णय समेत गरेको छ ।
