८ साउन, गोरखा । दरौदी र चेपे नदीबाट उत्पादन हुने १२० मेगावाटको बिद्युत १३२ केभी राष्ट्रिय प्रशारण ग्रिड लाइनमा जोड्ने गरी आयोजना निर्माणको काम अघि बढेको छ । डिपिआर तयार भइ ठेक्का सम्झौता भइसकेको केरावारी न्यू मस्र्याङदी १३२ केभी दरौदी करिडोर प्रशारण लाइन आयोजनाले जनाएको छ ।
दरौदी र चेपे नदीबाट उत्पादित १२० मेगावाट बिजुली सिरानचोक, गोरखा र पालुङटार हुदैँ तनहूँको मार्किचोकमा रहेको सवस्टेशनमा जडान गरिने आयोजना संयोजक कृष्णराज खनालले बताए ।
उनका अनुसार सिरानचोक गाउँपालिका–१ भिरसिङ स्थित कुदुङबारीमा १३२ केभी क्षमताको सवस्टेशन निर्माण हुनेछ । सवस्टेशन निर्माणका लागी सो क्षेत्रमा ४२ रोपनी जग्गा अधिग्रहण भइसकेको छ ।
‘दरौदी र चेपेको बिजुली त्यही सवस्टेशनमा जम्मा हुन्छ,’ खनालले भने, ‘त्यहाँबाट गोरखा–पालुङटार हुदैँ तनहूँको मार्किचोकमा लान्छौ ।’
आयोजना निर्माणका लागी गोरखा तर्फ करिव ७८ रोपनी जग्गा अधिग्रहण गर्नुपर्ने आयोजनाले जनाएको छ ।
‘कतै व्यक्तिगत कतै सरकारी जग्गा लिनुपर्छ, त्यो प्रक्रिया अघि बढाइसकेका छौ, व्यक्तिगत जग्गाको मुआब्जा निर्धारणको प्रक्रिया पनि शुरु भइसकेको छ,’ आयोजना संयोजक खनालले भने । राष्ट्रिय प्रशारण ग्रिड लाइनमा जडान गर्नका लागी राखिने टावरको संख्या भने एकीन नभएको उनले बताए ।
करिव ५० करोडको लागतमा निर्माण हुने आयोजना निर्माणको जिम्मा भारतीय कम्पनी स्किपर लिमिटेड जेभी ह्विथ स्यामा पावर लिमिटेडले पाएको छ । तीन बर्षमा काम सक्ने गरी २०७८ साल असार २७ गते ठेक्का सम्झौता भएको हो ।
राष्ट्रिय प्रशारण बिड कम्पनी लिमिटेड मार्फत निर्माण हुन लागेको उक्त आयोजनाले दरौदी र चेपे नदीमा उत्पादित १२० मेगावाटको बिद्युतलाई राष्ट्रिय प्रशारण लाइनमा जोड्नका लागी पुलको काम गर्ने छ ।
‘हामीले बिद्युत उत्पादन गर्ने होइन, उत्पादन भएको बिद्युतलाई राष्ट्रिय प्रशारण लाइनमा जोड्ने काम गर्ने हो,’ आयोजना संयोजक खनालले भने ।
