२४ साउन, गोरखा । नियम विपरित आफूलाइ निमित्त प्रधानाध्यापकको जिम्मेवारीबाट हटाइएको भन्दै साधना त्रिपाठीले बिरोध जनाएकी छन् । पूर्वाग्रही ढंगबाट बिद्यालय व्यवस्थापन समितिले आफूलाई जिम्मेवारीबाट हटाउने निर्णय गरेको उनको आरोप छ ।
त्रिपाठी विगत २३ बर्षदेखि गोरखा नगरपालिका–८ डुम्रिडाँडा स्थित रत्नलक्ष्मी माध्यमिक बिद्यालयमा निमित्त प्रअको रुपमा काम गर्दै आएकी छन् । तर यही साउन २१ गते बसेको विव्यसको बैठकले उनीबाट निमित्त प्रअको जिम्मेवारी खोसेर अर्का शिक्षक पूर्ण कुमार श्रेष्ठलाई दिने निर्णय ग¥यो । सोही निर्णयको बिरोध गर्दै त्रिपाठीले सम्बन्धित निकायसँग न्यायको माग गरेकी छन् ।
वुधवार प्रेस बिज्ञप्ती जारी गर्दै उनले शिक्षा नियमावलीको प्रक्रिया समेत पुरा नगरी आफूभन्दा कनिष्ठ शिक्षकलाई निमित्त प्रअको जिम्मेवारी दिइएको प्रति आपत्ति जनाएकी छन् । ‘विव्यसले विना कारण पूर्वाग्रही तरिकाले महिला भएकै कारणले बिना प्रक्रिया हटाउने बिभेदकारी निर्णय गरेकाले र नगर शिक्षाको निर्णय नआउँदै नियुक्ति प्रधानाध्यापकबाट कामकाज समेत संचालन भएकाले सो बिरुद्ध सम्बन्धित निकायहरुसँग न्यायको लागि माग गर्दछु,’ बिज्ञप्तीमा भनिएको छ ।
न्यायका लागी कानूनी उपचारमा समेत जाने उनले बिज्ञप्ती मार्फत जानकारी गराएकी छन् । हालसालै सम्पन्न स्थानीय तह निर्वाचनपछि बिद्यालयमा गठित नयाँ विद्यालय व्यवस्थापन समितिले राजीनामाका लागी पटक पटक ताकेता गरेको उनले बताइन् ।
बिद्यालय व्यवस्थापन समिति अध्यक्ष शरण श्रेष्ठले भने शिक्षा नियमावली अनुसार निमित्त प्रअको जिम्मेवारी परिवर्तन गरिएको बताए । प्रशासकको जिम्मेवारी पुरा नगरेको, कार्यसम्पादन क्षमता सन्तोषजनक नदेखिएको र प्रअमा हुनुपर्ने आचारण नभएको भन्दै त्रिपाठीको जिम्मेवारी खोसिएको उनले जानकारी दिए । विव्यससँग आवश्यक समन्वय नगरी एकलौटी ढंगले त्रिपाठी अघि बढ्दै आएको आरोप समेत श्रेष्ठले लगाएका छन् ।
बिव्यसले जिम्मेवारी परिवर्तनको निर्णय गरेर नगर शिक्षा शाखामा बुझाएको छ । तर नगर शिक्षा शाखाबाट भने आधिकारिक निर्णय आइसकेको छैन । गोरखा नगरपालिकाका नगर शिक्षा प्रमुख चन्द्र बहादुर खड्काले समितिको बैठक बस्न नभ्याएको बताए ।
‘प्रमुख प्रशासकीय अधिकृत हुनुहुन्न, उहाँ आएपछि हामी बैठक बसेर निर्णय गर्छाै,’ उनले भने ।
