२९ भदौ, गोरखा । गोरखाको भीमसेन थापा गाउँपालिकामा गण्डकी प्रदेश अन्तर जिल्ला स्तरीय पुरुष तथा खुल्ला महिला भलिवल प्रतियोगीता हुने भएको छ । बोर्लाङ खेलकुद बिकास समितिको आयोजनामा असोज १२ देखि १६ गतेसम्म प्रतियोगीता हुन लागेको हो ।
‘बोर्लाङ थापा कप–२०७९’ नाम दिइएको उक्त प्रतियोगीतामा गण्डकी प्रदेशका एघार वटै जिल्लाका टिमको सहभागीता रहने समितिका अध्यक्ष निराजन श्रेष्ठले बताए । पहिलो हुने टिमलाई एक लाख ३० हजार नगद पुरस्कार उपलब्ध गराइने उनले जानकारी दिए ।
दोस्रो, तेस्रो र चौथो हुनेले क्रमश ७० हजार, ३५ हजार र १५ हजार नगद पुरस्कार पाउने समितिले जनाएको छ । प्रतियोगीतामा एक टिममा दुई जनाभन्दा बढी बिभागिय खेलाडी राख्न नपाइने बताइएको छ ।
खुल्ला महिला तर्फ प्रथम हुने टिमले ७० हजार नगद पुरस्कार पाउने छ । दोस्रो हुनेले ४० हजार, तेस्रो हुनेले २० हजार र चौथो हुनेले १० हजार नगद पुरस्कार पाउने छन् ।
प्रतियोगीतामा वेष्ट प्लेयर, वेष्ट स्पाईकर, वेष्ट ब्लकर, वेष्ट डिफेन्डर, वेष्ट सर्भर, वेष्ट सेटर र वेष्ट कोचलाई पनि नगद पुरस्कारको व्यवस्था गरिएको छ ।
प्रतियोगीता अन्तरगत ३५ बर्ष माथिकालाई लक्षित गरी भेटेरान्स पुरुष भलिवल प्रतियोगीता पनि हुने आयोजकले जनाएको छ । अन्तर वडा स्तरिय प्रतिस्पर्धा हुने उक्त प्रतियोगीतामा पहिलो हुने टिमले ४० केजीको खसी र दोस्रो हुने टिमले २५ केजीको खसी पुरस्कार पाउने छन् ।
प्रतियोगीतामा सहभागी हुन टिमका लागी दर्ता शुल्क पनि निर्धारण गरिएको छ । पुरुष तर्फको प्रतियोगीतामा सहभागी हुने टिमले ७ हजार, खुल्ला महिला र भेटेरान्स तर्फको सहभागी टिमले ५÷५ हजार दर्ता शुल्क बुझाउनुपर्ने बताइएको छ ।
असोज ११ गते साँझ ५ बजेसम्म टिम दर्ता गराइसक्न आयोजकले आग्रह गरेको छ । खेलाडीलाई खान वस्नको निशुल्क व्यवस्था भएको बताइएको छ ।
प्रतियोगीता सम्पन्न गर्न करिव २१ लाख लाग्ने अनुमान आयोजकको छ ।
