१५ असोज, गोरखा । गोरखा नगरपालिका–६ पाटेचौर स्थित मानव सेवा आश्रमका बालबालिकाहरुको स्वास्थ्य बिमा गरिएको छ । गोरखा नगरपालिकाको आर्थिक सहयोगमा स्वास्थ्य शाखा मार्फत उनीहरुको बिमा गरिएको हो ।
शनिवार एक कार्यक्रमका बिच आश्रममा रहेका कुल ५१ जनाको बिमा गरिएको नगरपालिका स्वास्थ्य शाखाका निश्चल अर्यालले बताए । ‘उनीहरुको उपचार बिमा मार्फत समेट्ने मुख्य उदेश्य हो,’ उनले भने, ‘सोही उदेश्य अनुसार आज आश्रम पुगेर त्यहाँ रहेका बालबालिकाहरुको बिमा गरिदिएका हौ ।’
गोरखा अस्पताललाई प्रथम उपचार केन्द्र बनाएर बिमा गरिएको उनले जानकारी दिए । आवश्यकता अनुसार अन्य स्वास्थ्य संस्थाबाट पनि सेवा लिन सकिने उनको भनाइ छ । बिमा गरिएका बालबालिकाहरुले ९८ प्रकारका औषधी र अन्य स्वास्थ्य सेवा निशुल्क लिन पाउनेछन् । शनिवार बिमा गरिएका बालबालिकाहरुले मंसिर १ गतेबाट बिमाको सेवा लिन सक्ने बताइएको छ ।
‘सामान्यतया बिमा भएको तीन महिनापछि मात्र सेवा लिन पाउने प्रावधान छ तर यो महिना बिमा भएकाहरुले मंसिर १ गतेबाट सेवा लिन पाउछन्,’ अर्यालले भने ।
शनिवार एक कार्यक्रमका बिच बिमित बालबालिकाहरुलाई गोरखा नगरपालिकाका मेयर कृष्ण रानाले बिमा कार्ड हस्तान्तरण गरेका छन् । कार्यक्रममा बोल्दै उनले प्रत्येक वडामा दश जनाका दरले विपन्न र असहाय व्यक्तिको स्वास्थ्य बिमा नगरपालिकाले गरिदिने तयारी भइरहेको जानकारी दिए ।
‘नामावली संकलन गर्न भनेर सम्बन्धित वडाका अध्यक्षहरुलाई हामीले भनिसकेका छौ, नामावली संकलन भएर आएपछि बिमा गरिदिन्छौ,’ उनले भने ।
