२९ असोज, गोरखा । पूर्व प्रधानमन्त्री डा. बाबुराम भट्टराईले बुढीगण्डकी आयोजनाबाट प्रचण्ड, देउवा र ओलीले ९ अर्व कमिसन खाएको भनि लगाएको आरोप सच्चिएको बताएका छन् ।
शनिवार नेपाली कांग्रेस पार्टी कार्यालयमा आयोजित गठवन्धन दलहरुको अभिमुखिकरण कार्यक्रममा बोल्दै उनले आफूले पाएका केही सूचनाहरुको आधारमा विगतमा आरोप लगाएको भएपनि अहिले सच्चिएको बताएका हुन् । ‘हिजो त्यतिबेला मैले अलिकति आलोचना गरेकै हो, किनभने नेपाली आफैले बनाउनुपर्ने आयोजना कता–कता कसको खेलमा बाहिर जान लाग्यो भन्ने अर्थमा मैले केही सूचनाहरु पाएका थिए,’ उनले भने, ‘तर ती सूचनाहरु अपुष्ट थिए, त्यसको आधारमा मैले त्यो बेला बोलेकै हो, अव त्यो सच्चियो ।’
नेपाल आफैले आयोजना बनाउने भएपछि अव बुढीगण्डकीबारे आफूहरु बिच विवाद नभएको उनले स्पष्ट पारे । करिव डेढ बर्ष अघि गृह जिल्ला गोरखा आएको बेला भट्टराईले आयोजना निर्माणको जिम्मा चिनिया कम्पनी (गेजुवा ग्रुप) लाई दिँदा केपी शर्मा ओली, प्रचण्ड र शेर बहादुर देउवाले ९ अर्व घुस खाएको आरोप लगाएका थिए । आफूले त्यसको प्रमाण नै दिनसक्ने उनले बताएका थिए ।
तर शनिवार उनले त्यो सूचना अपुष्ट भएकाले त्यसलाई सच्याइएको बताएका छन् । बुढीगण्डकी बहुउदेश्यीय आयोजना मात्र नभइ गेमचेन्जर योजना समेत भएकाले यसलाई छिटो बनाउन उनले आग्रह समेत गरेका छन् ।
