६ कात्तिक, गोरखा । गोरखा र मनाङको सीमानामा हुने अपराधिक गतिविधि नियन्त्रणका लागी सुरक्षा निगरानी बढाइने भएको छ । शनिवार गोरखामा भएको दुई जिल्ला बिचको अन्तर जिल्ला समन्वय बैठकले सीमावर्ती नाकाहरुमा सुरक्षा चेकजाँच थप कडाइ गर्ने निर्णय गरेको हो ।
‘जिल्लाका सीमावर्ती नाका प्रयोग गरी हुन सक्ने अवैध हातहतियार तथा बिष्फोटक पदार्थ, लागू औषध, धार्मिक तथा पुरातात्विक वस्तु, बहुमूल्य जडिवुटी, वन पैदावार, निषेधित एवं संरक्षित वन्यजन्तु आदि अवैध वस्तुको चोरी निकासी तथा ओसार प्रसार जस्ता अपराधिक क्रियाकलाप रोक्न र गैरकानूनी कार्यहरु हुन नदिन सिमावर्ती नाकामा सुरक्षा चेकजाँचलाई थप प्रभावकारी बनाउने निर्णय गरेका छौ,’ गोरखा प्रमुख जिल्ला अधिकारी शंकरहरि आचार्यले भने ।
गोरखाको मनास्लु र मनाङको अन्नपूर्ण पदमार्गमा आउने पर्यटकको गतिविधी पनि निगरानी बढाउने उनले बताए । बिदेशी स्वयमसेवक एवं भ्रमण भिषामा नेपाल आएर सीमा क्षेत्रमा धर्म प्रचार गर्नेलाई कानूनी कारवाही गरिने उनले चेतावनी दिए ।
अपराधिक क्रियाकलाप नियन्त्रणका लागी अन्तर जिल्ला सूचना आदान प्रदान सँगै आवश्यक समन्वय गर्ने पनि बैठकले निर्णय गरेको छ । मंसिर ४ गतेको निर्वाचनमा हुन सक्ने निर्वाचन बिरोधी क्रियाकलाप र आचारसंहिता विपरित कार्यहरु रोक्नका लागी आपसी समन्वय गर्दै अघि बढ्ने सहमति समेत भएको छ ।
जिल्ला सुरक्षा समिति गोरखाको आयोजनामा भएको बैठकमा गोरखा र मनाङ जिल्लाका प्रमुख जिल्ला अधिकारी, सुरक्षा निकायका प्रमुख, निर्वाचन कार्यालयका प्रमुख लगायतको सहभागीता रहेको थियो ।
