स्थानीय चुनावमा गोरखा(२ का वडाअध्यक्षहरूले पाएको मतले पनि प्रचण्डलाई रेकर्ड बनाउने सपना देखाएको थियो । उक्त चुनावमा माओवादी केन्द्रका वडाअध्यक्षहरूले मात्रै २२ हजार २५० मत ल्याएका थिए । कांग्रेसका उम्मेदवारहरूले २१ हजार १३६ मत र जनता समाजवादी पार्टी (जसपा)ले ७ हजार ५०४ मत पाएको थियो ।

जसपाको मत बाबुरामको व्यक्तिगत प्रभावमा जाने हुनाले यो सबै मत प्रचण्डको पक्षमा थियो । यदि प्रचण्डले आकर्षण गरेको भए, उनले अहिले पाएको भन्दा राम्रो मत बटुल्न सक्थे । बरु, एमालेका वडाध्यक्षहरूले स्थानीय तहमा प्राप्त मत प्रतिनिधिसभाका उम्मेदवार मियाँले धेरै घट्न दिएनन् । यो क्षेत्रमा एमालेका वडाध्यक्षहरुले ७ हजार ९२६ मत प्राप्त गरेका थिए ।

उतारचढावपूर्ण सम्बन्धमा रहने बाबुरामको सदासयता, पार्टीका वरिष्ठ उपाध्यक्ष नारायणकाजीको गृह जिल्ला र उनको साथ अनि भर्खरै सम्पन्न स्थानीय तह निर्वाचनमा पार्टीले ११ मध्ये ९ वटाको प्रमुख जितेको चुनावी परिणामले प्रचण्डलाई उत्साहित बनाएको थियो ।

यससँगै सत्ता गठबन्धनमा आफ्नो पार्टीपछिको बलियो दल कांग्रेससँगको सहकार्यले रेकर्ड बनाउने सपना देख्नु कुनै नौलो कुरा थिएन । तर उनको त्यो सपना साकार हुन सकेन । प्रचण्डले रेकर्ड ब्रेक गर्न नसक्नुको पछाडी चुनावी कमाण्डरको गतिशिलताको कमी रहेको स्वयम कार्यकर्ताहरु बताउछन् ।

मतदाता भेटघाट कार्यक्रममा पार्टी कार्यकर्ताको घेरामा मात्र प्रचण्ड सिमित हुनुको असर पनि चुनावको मतपरिणाममा देखिएको उनीहरुको बुझाइ छ । ‘ओभर कन्फिडेन्ट’ पनि एक प्रमुख कारक रहेको उनीहरु बताउछन् । गोरखा २ मा कांग्रेसले बफादार भएर माओवादीलाइ भोट नहाल्दा पनि अपेक्षा अनुसारको मत आउन नसकेको माओवादी केन्द्रका एक कार्यकर्ताले बताए ।

‘गोरखा १ मा कांग्रेसका राजेन्द्र बजगाईलाई माओवादीले बफादार भएर भोट हाल्यो, दुवै पार्टीको समानुपातिक मतपरिणामले त्यो देखाउछ,’ उनले भने, ‘गोरखा २ मा भने कांग्रेसले माओवादीलाई खासै भोट हालेको देखिएनन ।’

गठवन्धनले कांग्रेसलाई बढी फाइदा

यसपटकको निर्वाचनमा लोकतान्त्रिक बाम गठवन्धनले कांग्रेसलाई बढी फाइदा भएको देखियो । गोरखा १ को प्रतिनिधिसभा सदस्य उम्मेदवार नेपाली कांग्रेसका राजेन्द्र बजगाई २०७४ सालको निर्वाचनमा एमालेका रामशरण बस्नेतसँग प्रदेशसभा सदस्यमा भारी मतान्तरले पराजित भएका थिए ।

तर गठवन्धनकै आडमा अहिले बजगाई प्रतिनिधिसभा सदस्यमा तिनै बस्नेतसँग भारी मतान्तरले बिजयी बने । यता गोरखा १ को ‘ख’ प्रदेशसभा सदस्यमा उम्मेदवारी दिएका कांग्रेसका नन्द प्रसाद न्यौपानेले पनि गठवन्धनको आडमा निकटतम प्रतिस्पर्धीलाई राम्रै मतान्तरले पछि पार्दै बिजयी बने ।

गोरखा २ को ‘ख’ प्रदेशसभा सदस्यमा बिजयी बनेका नेपाली कांग्रेसका सुरेन्द्रराज पाण्डेले पनि गठवन्धनकै कारण राम्रै मत प्राप्त गरेर बिजयी बने । समग्रमा उनीहरु लोकप्रिय उम्मेदवार होइनन् । तर गठवन्धनले उनीहरुको जित सहज बनायो । यता माओवादी केन्द्रका अध्यक्ष प्रचण्डले भने अपेक्षा अनुसारको मत प्राप्त गरेनन् ।

गोरखा १ को ‘क’ प्रदेशमा बिजयी बनेका माओवादी केन्द्रका कृष्ण धितालले भने गठवन्धनको फाइदा लिए । लोकप्रिय उम्मेदवार नभएपनि गठवन्धनकै कारण उनी बिजयी बने ।