२५ माघ, गोरखा । जिल्लामा संचालित घरेलु उद्योग तथा फर्मलाई मंगलवार व्यवसायिक उपकरण तथा प्रविधि हस्तान्तरण गर्ने कार्यक्रम थियो । गण्डकी प्रदेशका पर्यटन, उद्योग, वाणिज्य तथा आपूर्ति मन्त्री समेत कार्यक्रममा उपस्थिती हुने पक्का थियो । तर सोमवार एकाएक मन्त्रालयबाट फोन आयो र कार्यक्रम स्थगित गर्न भनियो । वितरण हुने उपकरण खरिदमा असन्तुष्टी जनाउँदै केही व्यवसायीको बिरोध आएपछि कार्यक्रम तत्कालका लागी स्थगित भएको हो ।
प्रविधि हस्तान्तरण कार्यक्रम अन्तरगत पर्यटन तथा उद्योग कार्यालय गोरखाले डिजिटल सिलाई मेसिन, चाप कटर, कम्वाइन मिल, डि–फ्रिज, इन्भटर एवं ब्याट्री, कपडा बुन्ने तान लगायतका उपकरण वितरण गर्न लागेको थियो । २९ वटा उद्योग तथा व्यवसायिक फर्महरु छनोट समेत भइसकेका थिए । कार्यालयले अधिकांश उपकरण खरिद गरिसकेको छ । तर गैरव्यवसायीबाट उपकरण खरिद भएको भन्दै केही व्यवसायीले बिरोध गरेपछि कार्यक्रम स्थगित भयो ।
सामान खरिदका लागी आफूहरुसँग कोटेशन समेत माग नगरेको उनीहरुले गुनासो गरेका छन् । ‘सामान खरिदका लागी कार्यालयमा सूचिकृत भएका फर्महरुसँग समन्वय गरेर कोटेशन माग्नुपर्ने होे,’ असन्तुष्टमध्येका एक व्यवसायीले भने, ‘तर कार्यालय प्रमुखले त्यसो गर्नुभएन, आफूलाई मन लागेको तीन वटा फर्मसँग कोटेशन माग्नुभयो र मिलाएर आफ्नो मान्छेलाई पार्नुभयो ।’
दुई छुट्टाछुट्टै शिर्षकमा उद्यमीहरुलाई उपकरण वितरण गर्न लागेको कार्यालयले दलित विपन्न तथा परम्परागत सीप भएकाहरुका लागी वितरण गर्ने उपकरण खरिद गर्न एवियान एग्रो नेपाल प्रालि पोखरासँग सम्झौता गरेको छ । उक्त शिर्षकमा करिव पाँच लाख रकम कार्यालयबाट विनियोजन भएको छ भने उद्यमीको १० प्रतिशत लागत सहभागीता रहेको छ ।
त्यस्तै संचालित उद्योगहरुको प्रवद्र्धनका लागी साझेदारीमा उद्यमीलाई वितरण गर्ने उपकरण खरिदका लागी गोरखा नगरपालिका–६ स्थित सन्ध्या इन्टरप्राइजेजसँग सम्झौता भएको छ । उद्यमीहरुको ५० प्रतिशत लागत सहभागीता सहित कुल बजेट करिव दश लाख रहेको कार्यालयले जनाएको छ ।
सबै प्रक्रिया पूरा गरेर विधिवत ढंगले उपकरण खरिद गरिएको कार्यालय प्रमुख सूर्य भुजेलले बताए । ‘सार्वजनिक खरिद ऐन २०६३ अनुसार तीन वटा फर्मसँग कोटेशन माग गर्नुपर्ने भन्ने छ,’ उनले भने, ‘त्यही अनुसार तीन वटा फर्मसँग कोटेशन माग्यौ, जसले कम मूल्यमा कोटेशन हाल्नुभयो उहाँलाई नै छनोट ग¥यौ ।’ सार्वजनिक खरिद ऐन २०६३ अनुसार दश लाखसम्मको माल सामान कार्यालयले सोझै खरिद गर्न पाउने व्यवस्था समेत रहेको उनले जानकारी गराए ।
अन्तिम चरणमा आएर कार्यक्रम स्थगित हुदाँ समस्या भएको उनले गुनासो गरे । ‘कार्यक्रमबाट लाभान्वित हुने उद्यमीहरुले सम्बन्धित आपूर्तीकर्ताहरुलाई लागत सहभागीता वापतको रकम बुझाइसकेका छन्, अव त्यो पैसा कसरी फिर्ता गर्ने भन्ने समस्या हुन्छ,’ उनले भने । अधिकांश उपकरण खरिद समेत भइसकेकाले पनि समस्या बनाएको उनको भनाइ छ । मन्त्रालयसँग समन्वय गरेर चाडै उक्त उपकरण वितरण गर्ने उनले आश्वासन समेत दिएका छन् ।
