२ फागुन, गोरखा । द्रव्यशाह बहुमुखी क्याम्पसका प्रमुख रामचन्द्र दुवाडीमाथि भएको कुटपिटको घटनाप्रति स्वतन्त्र बिद्यार्थी यूनियनले भत्सर्ना गरेको छ । घटना पश्चात बिज्ञप्ती जारी गर्दै स्ववियूले घटनामा संलग्नलाई कारवाहीको माग गरेको छ ।
अनेरास्ववियू (क्रान्तिकारी) क्याम्पस इकाइ अध्यक्ष अनिस अर्यालको नेतृत्वमा आएका केही युवाहरु गोरखा नगरपालिकाको सरकारी मोटरसाइकल समेत प्रयोग गरी गुण्डागर्दी शैलीमा क्याम्पस हाताभित्र प्रवेश गरेको र क्याम्पससँग असम्बन्धित बिषयलाई लिएर क्याम्पस प्रमुखमाथि हातपात तथा दुव्र्यवहार गरेको भन्दै उनीहरुले बिरोध जनाएका हुन् ।
दोषीलाई कारवाहीको माग गर्दै स्ववियूले घटनामा संलग्नहरुलाई कुनै राजनीतिक दलको संरक्षण गरिएमा बिद्यार्थीहरु बिरोधमा उत्रिने चेतावनी समेत दिएको छ ।
उक्त घटनाको क्याम्पसका कर्मचारी संघ र पब्लिक क्याम्पस प्राध्यापक संघले पनि भत्सर्ना गरेका छन् । संयुक्त रुपमा बिज्ञप्ती जारी गर्दै उनीहरुले घटनामा संलग्नलाई अविलम्व कानूनी कारवाही गर्न माग गरेका छन् । ‘लोकतन्त्रको सुन्दर पक्षको रुपमा अभिव्यक्ति स्वतन्त्रता संविधानले व्यवस्था गरेको भए तापनि यस्ता अमानवीय र अपमानजनक व्यवहारले कानुन र लोकतन्त्रकै खिल्ली उडाएको छ,’ बिज्ञप्तीमा भनिएको छ, ‘क्याम्पस प्रमुख भए तापनि वहाँको व्यक्तिगत बिषयलाई लिएर शिक्षाको मन्दिर क्याम्पसमा नै अराजक घटना गराउने र शैक्षिक वातावरण नै बिगार्ने काम निन्दनीय छ ।’
समस्या समाधान र कानुनी उपचारका अन्य उपायको ख्याल नै नगरी व्यक्तिगत रुपमा सामाजिक सञ्जालमा उल्लेख गरिएको बिषयलाई लिएर क्याम्पस प्रमुखमाथि हातपात तथा तोडफोडका घटनाले प्राध्यापक कर्मचारीको मनोवल गिराउने काम भएको र यसले सुरक्षा चुनौती थपिएको उनीहरुले बताएका छन् । दोषीलाई संरक्षण प्रदान गरी प्रोत्साहन गरेमा बिरोधका कार्यक्रम गर्ने चेतावनी उनीहरुले दिएका छन् । घटनाको बिरोध गर्दै उनीहरुले आज क्याम्पसको पठनपाठन समेत ठप्प बनाएका छन् ।
जनयुद्धको सन्दर्भलाई जोड्दै दुवाडीले सामाजिक संजालमा पोष्ट गरेको अभिव्यक्तिलाई लिएर अनेरास्ववियू (क्रान्तिकारी) क्याम्पस इकाइका बिद्यार्थीहरुले मंगलवार बिहान उनीमाथि हातपात गरेका थिए । उनीहरुले प्रमुखको कार्यकक्षमा रहेको टेवल समेत तोडफोड गरेका थिए ।
नेपाल बिद्यार्थी संघले पनि घटनाको बिरोध गर्दै दोषीलाई कारवाहीको माग गरेको छ । बिज्ञप्ती जारी गर्दै क्याम्पसमा सुरक्षाको प्रत्याभूती दिलाउन समेत माग गरेको छ ।
