२१ फागुन, गोरखा । होली पर्वमा हुन सक्ने अपराधिक क्रियाकलाप नियन्त्रणका लागी जिल्लाको सुरक्षा व्यवस्थामा कडाइ गरिने भएको छ । त्यसका लागी जिल्ला प्रहरी कार्यालयले बिशेष सुरक्षा योजना बनाएको छ । सुरक्षा सम्वेदनशिलतालाई मध्यनजर गर्दै बजार क्षेत्रका मुख्य चोकहरुमा चेकजाँच बढाइने डिएसपी लिलाराज लामिछानेले बताए ।
‘सवारी चेकजाँच पनि बढाउँछौ,’ उनले भने, ‘नियम उल्लघंन गर्नेलाई तत्काल कारवाही हुन्छ ।’ कुनै घटना भएमा खटिनका लागी क्यूआरटी (क्विक रेस्पोन्स टिम) तयारी अवस्थामा रहने उनले जानकारी दिए । सिनियर प्रहरी अधिकृत नेतृत्वको ‘स्ट्राइकिङ टिम’ समेत परिचालन हुने बताइएको छ । आइतवार पर्चा पम्प्लेट वितरण गर्दै प्रहरीले आम नागरिकलाई सचेत समेत गराएको छ ।
इच्छा विपरित रङ दल्ने र लोला हान्ने कार्य नगर्न आग्रह गर्दै प्रहरीले यस्ता कार्य गर्नेलाई कारवाही गर्ने चेतावनी समेत दिएको छ । सभ्य भएर होली मनाउन कार्यालयको आग्रह छ ।
केही घटना भएमा प्रहरीको हटलाइन नम्वर १०० वा ९८५६०९०२५५ र ९८५७०९०८५५ मा सम्पर्क गर्न समेत प्रहरीले आग्रह गरेको छ ।
