शुल्क निर्धारणको कारण देखाएपनि दुई संस्थाबिचको विवादको प्रमुख कारण पुरानो र नयाँ कार्यसमिति बिचको द्धन्द्ध हो । दरौदी खानेपानी संस्थाका अध्यक्ष अर्याल यसअघि पृथ्वीनारायण खानेपानी संस्थाका अध्यक्ष थिए । यसअघि उनको समितिमा रहेका अधिकांश पदाधिकारीहरु पनि अहिले दरौदीकै पदाधिकारीमा छन् । नयाँ संस्थामा जाँदै गर्दा आर्थिक हिनामिना गरी पुरानो संस्थालाई भद्रगोल बनाएको आरोप उनीहरु माथि छ । उनीहरुले नयाँ कार्यसमितिलाई हालसम्म माइन्यूट समेत नबुझाएको पृथ्वीनारायण खानेपानी संस्थाकी अध्यक्ष खड्काले गुनासो गरिन् ।

‘संस्थाको नाममा एक÷एक वटा प्रिन्टर, ल्यापटप, हिलो फाल्ने पम्प र मोटरसाइकल अनि दुई वटा मोवाइल थियो,’ उनले भनिन्, ‘तर उनीहरुले ती सामान आजसम्म बुझाएका छैनन् ।’ बुझाउनका लागी पटक पटक पत्राचार गर्दा समेत उनीहरुले वेवास्था गरेको उनले बताइन् । ‘एउटा बिग्रिएको ल्यापटप ल्याएर हामीलाई जानकारी नदिई कार्यालयमा छाडेर जानुभएछ, अरु सामान कहाँ छ थाहा छैन,’ उनले भनिन् ।
अर्याल नेतृत्वको समितिले खर्च प्रणाली समेत व्यवस्थित नगरी आर्थिक हिनामिना गरेको आरोप छ ।

आर्थिक बर्ष २०७८÷७९ मा नक्कली बिजक खडा गरी बिभिन्न व्यक्तिको नाममा संस्थाले भुक्तानी गरेको करिव साढे ११ लाख रकम बेरुजु समेत देखिएको लेखापरिक्षण प्रतिवेदनमा उल्लेख छ । बिधान अनुसार गर्नुपर्ने अधिवेशन समेत नगरेको र भौतिक सम्पत्तिको विवरणको अभिलेखमा समेत उनीहरु चुकेको बताइएको छ । छानविनका लागी संस्थाका वर्तमान उपाध्यक्ष सुरेशमान श्रेष्ठको संयोजकत्वमा समिति समेत गठन भएको छ । संस्था बिरुद्ध अख्तियारमा मुद्धा समेत परेको छ ।

यता संस्थाका पूर्व अध्यक्ष (हाल दरौदी खानेपानी संस्थाका अध्यक्ष) अर्यालले भने आफूहरु माथि झुटो आरोप लगाइएको बताए । ‘माइन्यूट र कार्यालयका सामानहरु कार्यालयकै कर्मचारीहरुसँग हुन्छ, हामीले बोकेर हिडेका हुदैनौ, कार्यालयमै उहाहरुले खोज्नुप¥यो नी !’ उनले भने ।