२५ फागुन, गोरखा । गण्डकी प्रदेशका मुख्यमन्त्री सुरेन्द्रराज पाण्डेले कांग्रेससँगको सहकार्य टुटाएर प्रधानमन्त्री पुष्पकमल दाहाल प्रचण्डले गोर्खाली जनताको जनमतको अपमान गरेको बताएका छन् । शुक्रवार गोरखा उद्योग वाणिज्य संघको स्वर्ण जयन्ती कार्यक्रममा बोल्दै उनले निर्वाचनको समयमा प्रचण्डले गोरखाली जनतासँग गरेका वाचाहरु सबै झुटा सावित भएको बताए ।
‘गोरखा क्षेत्र नम्वर २ त्यसमा पनि बिशेष गरी २ को २ मा जाँदा त्यहाँको जनतालाई भन्नुहुन्छ के ?’ प्रचण्डलाई प्रश्न गर्दै पाण्डेले भने, ‘चुनावको बेला पाँच बर्ष सँगै हिड्छु । सुरेन्द्रराज पाण्डेलाई मुख्यमन्त्री बनाउछु गण्डकी प्रदेशको र म प्रधानमन्त्री बन्छु भनेर हरेक भाषणमा भन्नुभएको थियो । ५० ठाउँमा बोल्दा ४९ ठाउँमा भन्नुभयो होला यो कुरा, छुट्यो होला एक÷दुई ठाउँमा । तर किन जान सक्नुभएन पाँच बर्ष ? किन जान प्रयत्न गरिएन ?’
देशको नेतृत्व गर्ने मान्छे नै अस्थिरताको कारण हुन थालेपछि मुलुकको अवस्था के होला भन्दै उनले चिन्ता व्यक्त गरे । ‘आर्थिक राजनीतिक रुपले हरेक परिस्थितीमा देश अस्थिर बन्न थाल्यो भने त्यो थाम्ने देशको मुलीले हो, तर देशको मुलीले खुलेआम भन्छ म बाचुञ्जेल यस्तै उथलपुथल भइरहन्छ, स्थिरता म हुनै दिन्न, अनि यो मुलुकको भविष्य के हुन्छ !’ पाण्डेले भने ।
गण्डकी प्रदेशमा मध्यावधी निर्वाचन हुने सम्भावना बढेको उनले जानकारी गराए । अहिले संघमा बनेको गठवन्धन अघि बढे गण्डकी प्रदेशमा कुनै पनि पार्टीको सरकार बन्न नसक्ने उनले दावी गरे । ‘कुनै पार्टीको बहुमत पुग्न सक्दैन, कुनै पनि सरकार बन्न नसकेपछि फ्रेस म्यान्डेड नै हो, तर म त्यता जान चाहन्न । म सकेसम्म त्यसलाई रोक्न प्रयत्न गर्छु,’ उनले भने ।
यसको निकास खोज्न राजनीतिक दलहरुलाई आफूले आग्रह समेत गर्दै आएको उनले जानकारी दिए ।
