१७ चैत्र, गोरखा । शनिवार बिहान काठमाडौंबाट गोरखा आउँदै गरेको बा २ ज ४१९६ नम्बरको ट्याक्सी त्रिशूली नदीमा खस्दा एकै परिवारका पाँच जनाको मृत्यु भयो । मृत्यु हुनेमा गोरखा नगरपालिका–७ पौवाखेतकी ७० वर्षीया जुनकिरी रोका, वडा नं ४ फिनामकी ४१ बर्षीय हरिमाया रोका, ८ बर्षीय आगमन उपरकोटी, याङकोटकी २८ वर्षीया अञ्जना रोका र चालक गोरखा नगरपालिका–७ बतासेका ३५ वर्षीय अर्जुन सिर्मल रहेका छन् । पौवाखेतका १८ वर्षीय विवश रोका अझै वेपत्ता छन् । प्रहरीले उनको खोजी गरिरहेको छ ।
गोरखा नगरपालिका–७ पौवाखेतका शंकर रोकाको क्यान्सरबाट मृत्यु भएपछि उनीहरु दाहसंस्कारका लागी शुक्रवार काठमाडौं गएका थिए । शुक्रवार राती करिव ११ बजे दाहसंस्कारको काम सकेपछि गोरखा फर्कने निधो गरे । दुई वटा ट्याक्सी र एउटा माइक्रोमा उनीहरु सँगसँगै काठमाडौंबाट गोरखा तर्फ लागे ।
एउटा ट्याक्सी प्रकाश रोकाले चलाएका थिए । उनी मृतक अर्जुन (ट्याक्सी चालक) का जेठान हुन्् । अर्काे ट्याक्सी अर्जुन स्वयमले चलाएका थिए । ‘मेरो ट्याक्सीमा ज्वाँई (अर्जुन) को बुढी, भान्जी, भाईको छोरी र क्यान्सर लागेर बित्ने दाईको बुढी हुनुहुन्थ्यो,’ प्रकाशले भने, ‘ज्वाँइ (अर्जुन) ले चलाउनुभएको ट्याक्सीमा क्यान्सरबाट बित्नुभएका दाईको आमा, छोरा, जेठी दिदी, भान्जा, माइला ज्वाई र कान्छी बहिनी चढनुभएको थियो ।’ बिहान ४ बजे सबै चरौदी आइपुगेर सँगै चिया नास्ता गरेको उनले बताए ।
‘त्यहाँबाट म अगाडी लागे । बाटोमा अर्जुन ज्वाँइले फोन गरेर बाबुलाई खुवाउन स्याउँ किन्नुप¥यो, मुग्लिनमा रोक्नु है भन्नुभयो,’ प्रकाशले भने । उनी मुग्लिन आएर पर्खिरहे । माइक्रोले उनलाई उछिनेर गयो । तर अर्जुनले चलाएको ट्याक्सी अझै आइपुगेन । ‘सँगै आएको माइक्रोले उछिनेको १०–१५ मिनेट भइसक्दा पनि नआएपछि मैले ज्वाँइलाई दुई पटकसम्म फोन गरे तर उठेन,’ उनले भने, ‘पछि उतैबाट फोन आयो । फोन उठाउँदा एक्कासी दाई म डुव्न लागे मलाई बचाउनुहोस् भन्दै अत्तालिदै बोल्नुभयो ।’ बिहान ५ बजेर ६ मिनेट जाँदा फोन आएको उनले बताए ।
लोकेशन भन्नुस् भन्दै प्रकाशले बारम्वार सोधिरहे । तर उताबाट ‘म डुव्न लागे बचाउनुस्’ भन्ने बाक्य मात्र दोहोरिरह्यो । आवाज सानो हुदैँ गयो । त्यसपछि प्रकाश ट्याक्सी लिएर मझिमटार फर्किए ।
‘माइक्रोले उहाहरुलाई मझिमटारमा ओभरटेक गरेको रहेछ, त्यसैले त्यहाँबाट यता बाटोमा केही भयो भन्ने लागेर सिधै मझिमटार गयौ,’ प्रकाशले भने । मझिमटारबाट खोज्दै उनीहरु कुरिनटार आइपुगे । नभेटिएपछि प्रहरीलाई खवर गरे । प्रहरीले बिभिन्न ठाउँमा खवर ग¥यो । फर्कदै गर्दा प्रहरीको उद्धारमा खटिएको देखेपछि बल्ल दुर्घटना भएको थाहा पाए ।
मृतकहरुको शव गोरखा अस्पताल ल्याएर पोष्टमार्टम गरिएको छ ।
