२७ चैत्र, गोरखा । नेपाली सेनाको दोस्रो ऐतिहासिक गोरखा–जितगढी एकीकरण पदयात्रा शुरु भएको छ । मंगलवार गोरखा दरवारबाट यात्रा शुरु भएको हो । अधिकृतको कमाण्डमा ४८ जना यात्रामा सहभागी छन् ।
उनीहरुलाई एक कार्यक्रमका बीच तत्कालिन समयमा पृथ्वीनारायण शाहले खडा गरेको पाँच पल्टन (पुरानो गोखर, कालिबक्स, बर्दवाणी, सवुज र श्रीनाथ) को झण्डा र टर्च लाइट दिएर विदाइ गरिएको रिपुमर्दन गणका गणपती अशोककुमार क्षेत्रीले बताए । नेपाली सेनाका पश्चिम पृतना हेडक्वाटरका पृतनापति उपरथी सन्तोष बल्लभ पौडेल, गोरखा जिल्ला अदालतका न्यायधीश शिवबहादुर रानाभाट, गोरखा नगरपालिकाका मेयर कृष्ण राना, प्रमुख जिल्ला अधिकारी भोला दाहालले संयुक्त रुपमा झण्डा र टर्च हस्तान्तरण गरेका हुन् । गोरखाबाट शुरु भएको यात्रा तनहुँ पाल्पा हुदैँ जितगढी पुग्ने गणपती क्षेत्रीले बताए ।
‘आठ दिनको यात्रा हुनेछ,’ उनले भने, ‘गोरखाको टोलि पालुङटारको सतिघाट पुगेर तनहूँलाई हस्तान्तरण गर्छ । तनहूँले पाल्पालाई र पाल्पाले रुपन्देहीलाई बुझाउछ ।’ रुपन्देशीको टोलि बैशाख ५ गते जितगढी पुगेर बिजय उत्सवमा सहभागी हुने उनले जानकारी दिए । उनका अनुसार नेपाल र तत्कालिन ब्रिटिस इस्ट इण्डिया कम्पनीबीच भएको लडाइमा बिजय प्राप्त गरेको दिन (बैशाख ७ गते) लाई बिजय उत्सवको रुपमा मनाउने गरिन्छ ।
ऐतिहासिक कोट, गढी, किल्लाहरुको संरक्षण गर्दै इतिहासको जगेर्ना गर्ने उदेश्यका साथ पदयात्रा शुरु गरिएको पृतनापति पौडेलले बताए । पर्यटन प्रवद्र्धनमा समेत यसले सहयोग पु¥याउने उनले जानकारी दिए ।
करिव दुई सय सात किलोमिटर दुरीको यात्रामा सहभागीलाई सम्बन्धित स्थानीय तह र जिल्लाको सिमानामा जनप्रतिनिधि, सुरक्षा निकायका प्रमुखहरु सहितको उपस्थितिमा बिदाई गर्ने कार्यक्रम तय भएको नेपाली सेनाले जनाएको छ ।
