२७ चैत्र, गोरखा । जिल्लामा संचालित घरेलु उद्योग तथा पसलहरु बन्द हुने क्रम बढ्न थालेको छ । कोभिड पश्चात यो क्रम बढ्न थालेको पर्यटन तथा उद्योग कार्यालय गोरखाले जनाएको छ । कार्यालयको तथ्याङ्क अनुसार चालु आर्थिक बर्षको फागुन मसान्तसम्म ६० वटा उद्योग बन्द भइसकेका छन् ।
‘बन्द गर्न भन्दै आवश्यक कागजात सहित उहाँहरुले कार्यालयमा निवेदन दिनुभयो,’ कार्यालय प्रमुख सुर्य भुजेलले भने, ‘आवश्यक प्रक्रिया पु¥याएर हामीले दर्ता खारेज गरिदियौ ।’ त्यस्तै पसल संचालन गर्दै आएका ७३ वटा फर्म पनि खारेज गरिएको उनले जानकारी दिए । उनका अनुसार गत आर्थिक बर्ष २०७९\८० मा कुल ३९ वटा घरेलु उद्योग बन्द भएका थिए भने १ सय ७ वटा फर्मको दर्ता खारेज भएका थिए ।
शिविरमा २५ वटा उद्योग\व्यवसाय दर्ता
कार्यालयले बिभिन्न स्थानीय तहमा संचालन गरेको उद्योग\व्यवसाय दर्ता शिविरमा ११ वटा उद्योग र १४ वटा वाणिज्य फर्म (पसल) दर्ता भएका छन् । सबैभन्दा धेरै आरुघाट गाउँपालिकामा आठ वटा नयाँ उद्योग दर्ता भएको कार्यालय प्रमुख भुजेलले बताए ।
अजिरकोट गाउँपालिकामा २ र पालुङटार नगरपालिकामा १ वटा उद्योग दर्ता भएको उनले जानकारी दिए । शिविरमा ४ वटा उद्योग नविकरण भएको र २ वटा खारेज गरिएको बताइएको छ । वाणिज्य तर्फ १५ वटा फर्म नविकरण र २ वटा फर्म खारेज गरिएको कार्यालयले जनाएको छ । शिविरमा उपलब्ध गराइएको बिभिन्न सेवाबाट कुल ७२ हजार ९ सय राजश्व रकम संकलन भएको कार्यालय प्रमुख भुजेलले बताए ।
उनका अनुसार चालु आवको फागुन मसान्तसम्म १ सय २२ वटा उद्योग र वाणिज्यतर्फ ७८ प्राइभेट फर्म दर्ता भएका छन् । गत आव २०७९\८० मा भने कुल ३ सय १५ नयाँ उद्योग दर्ता भएको र वाणिज्य तर्फ १ सय ५४ वटा नयाँ फर्म दर्ता भएको कार्यालयले जनाएको छ ।
