वडा नम्वर ६ मा गार्मेन्ट उद्योग संचालनमा छ । ट्रयाक, टिसर्ट लगायतका कपडा उत्पादन गर्न थालिएको वडाध्यक्ष रञ्जन रिमालले बताए । उनका अनुसार गार्मेन्ट संचालनको जिम्मा चण्डेश्वरी महिला बचत तथा ऋण सहकारी संस्थाले पाएको छ । ‘हामीले एड्भान्स तालिम पनि दिइसक्यौ,’ उनले भने, ‘उत्पादन राम्रै हुन थालेको छ । उत्पादन भएको कपडा हामी स्थानीय कर्मचारीले खपत गर्ने गरेका छौ ।’

वडा नम्वर ७ मा ढाका उद्योग र माटोको भाडा उत्पादन सुरु भएको छ । सिमलटार जलबिरे टोल बिकास संस्थाले ढाका उद्योग संचालन गरेको छ भने ठुलोपोखरी टोल बिकास संस्थाले माटो भाडा उत्पादन सुरु गरेको छ । तालिम लिएरु ढाकाको साडी, चोलो, पछ्यौरा लगायतका लुगा उत्पादन थालिएको वडाध्यक्ष नारायण श्रेष्ठले बताए । ‘तालिम लिएर उत्पादन सुरु भएको हो,’ उनले भने, ‘त्यो उत्पादनलाई स्थानीय स्तरमै व्यवस्थापन गर्दै आएका छौ ।’

वडा नम्वर ८ मा दुना टपरी उद्योग संचालनमा छ । सृजनशिल बचत तथा ऋण सहकारी संस्थाले उक्त उद्योग संचालन गरेको हो । उद्योग संचालनका लागि ४० जनाले तालिम लिएका थिए । उत्पादित दुना टपरीको बजार व्यवस्थापनमा भने समस्या भएको वडाध्यक्ष बिष्णुकुमार श्रेष्ठले बताए । ‘केही उत्पादन स्थानीय स्तरमै खपत भइरहेको छ, तर बजार पाइरहेको छैन,’ उनले भने, ‘पालिकामा प्लाष्टिक प्लेटहरु प्रतिवन्ध गर्न सके दुना टपरीले बजार पाउथ्यो ।’

स्थानीय उत्पादनमा आत्मनिर्भर बनाउँदै रोजगारको सृजना गरि आयआर्जनमा बृद्धि गर्ने उदेश्यले उक्त कार्यक्रम ल्याइएको प्रमुख प्रशासकीय अधिकृत चित्रबहादुर अधिकारीले बताए । कार्यक्रम संचालनका लागि गत बर्ष प्रति वडा पाँच लाखका दरले रकम उपलब्ध गराइएको उनले जानकारी दिए । ‘वडा समितिले पहिचान गरेको सम्भावना र आवश्यकताका आधारमा कार्यक्रम वाँडफाँड गरेका हौ,’ उनले भने, ‘सामुदायिक संघसंस्था, सहकारी र महिला समूहको साझेदारीमा काम सुरु भएको हो ।’

आवश्यक तालिम र प्रविधि पालिकाले उपलब्ध गराएको उनले जानकारी दिए ।

वडागत रुपमा उत्पादित उपजको बजार व्यवस्थापनका लागि वगुवामा रहेको हाट बजार तथा संकलन केन्द्रलाई संचालन गर्ने तयारी भइरहेको पालिकाले जनाएको छ । ‘अहिले भर्खर सुरुवाती चरणमा छौ, अव उत्पादन बृद्धि हुदै गएपछि त्यसको बजार व्यवस्थापनमा पालिकाले आवश्यक सहयोग र समन्वय गर्छ,’ उनले भने ।