१६ भदौ, गोरखा । शहिद लखन गाउँपालिकाले बिद्यार्थी संख्या कम भएका सामुदायिक बिद्यालयहरुमा शिक्षकको दरवन्दी कटौती गर्न थालेको छ । गत बर्षमात्रै सात वटा बिद्यालयबाट आठ जना शिक्षकको दरवन्दी कटौती गरिएको पालिकाको शिक्षा शाखा प्रमुख राजेन्द्र खनालले बताए । ‘बिद्यार्थी संख्या कम भएको बिद्यालयबाट दरवन्दी कटौती गरेर अन्य बिद्यालयमा सारेका छौ,’ उनले भने, ‘दरवन्दी कटौतीसँगै ती बिद्यालयको तह पनि घटाएका छौ ।’
उनका अनुसार गत बर्ष वडा नम्वर १ को महेन्द्र शक्ति माविमा संचालित ‘प्लस टु’ हटाइएको छ । सो बिद्यालयमा रहेको ‘प्लस टु’ को एउटा स्वीकृत दरवन्दी (शिक्षकको) पनि हटाएर वडा नम्वर ६ को बतासेस्थित भगवती हिमालय माविमा सारिएको छ ।
वडा नम्वर १ को लक्ष्मी प्राविमा पनि एउटा शिक्षक दरवन्दी कटौती भएको छ । बिद्यार्थी संख्या घट्दै गएपछि तीन कक्षासम्म संचालन हुदैँ आएको उक्त बिद्यालयको तह घटाएर हाल बाल बिकास कक्षासम्म मात्र संचालन गरिएको पालिकाले जनाएको छ ।
वडा नम्वर २ को बालज्योती प्रावि, वडा नम्वर ६ दार्चेको पिपलापोखरी आधारभूत बिद्यालय र अँधेरीको दुर्गा प्राविको पनि शिक्षक दरवन्दी कटौती गरिएको छ । एक÷एक वटा शिक्षक दरवन्दी कटौती गरी बिद्यालयको तह पनि घटाइएको शिक्षा शाखा प्रमुख खनालले बताए । ‘१ देखि ३ कक्षासम्म संचालन हुदैँ आएको थियो, बिद्यार्थी संख्या घट्दै गएपछि यो बर्ष बाल बिकास कक्षामा झारेका हौ,’ उनले भने ।
यता वडा नम्वर ६ को रानीस्वाँरास्थित जलकन्या प्रावि र मण्डली प्राविमा दुई÷दुई वटा शिक्षक दरवन्दी कटौती भएको छ । पाँच कक्षासम्म संचालन हुदैँ आएको उक्त बिद्यालयको तह घटाएर बाल बिकास कक्षामा झारिएको पालिकाले जनाएको छ । ‘पाँच कक्षासम्म संचालन हुदैँ आएपनि बिद्यार्थी घटेपछि केही बर्ष यता तीन कक्षासम्म मात्र संचालन हुदै आएका थिए,’ खनालले भने, ‘बिद्यार्थी नभएर अहिले दुवै बिद्यालयलाई बाल बिकास कक्षामा झा¥यौ ।’
बिद्यार्थी संख्या कम भएका बिद्यालयलाई दरवन्दी कटौती हुने अघिल्लो बर्ष नै जानकारी गराउने गरेको भन्दै उनले थपे, ‘हामीले एक्कासी दरवन्दी कटौती गरेर शिक्षकको तह घटाउने गरेका छैनौ । बिद्यार्थी संख्या कम भए कटौती गर्छाै है भनेर अघिल्लो बर्ष नै जानकारी गराएका हुन्छौ ।’
यो बर्ष वडा नम्वर १ को थानी आधारभूत बिद्यालय र वडा नम्वर ९ को कालिका अमरज्योती आधारभूत बिद्यालयको दरवन्दी कटौती हुन सक्ने संकेत बिद्यालयलाई दिइसकिएको उनले जानकारी गराए । बिद्यार्थी संख्याको आधारमा कटौती गर्ने नगर्ने निर्णय गरिने उनको भनाइ छ ।
