यता फोहोर व्यवस्थापन बोर्डका अध्यक्ष जोशीले खानेपानीको मुहानमा कुनै असर नपर्ने जिकिर गरे । ‘अहिले मनकामना बजारको फोहोर वडा नम्वर २ स्थित काठेखोला भन्ने ठाउँमा अस्थायी रुपमा संकलन गर्ने गरेका छौ तर, व्यवस्थित छैन,’ उनले भने, ‘यो योजना सफल भए मनकामना बजार क्षेत्रसँगै वडा नम्वर २ र ३ को बिभिन्न ठाउँको फोहोर व्यवस्थापनमा निकै सहज हुन्थ्या ।’ उक्त योजनाबाट स्थानीयलाई रोजगारको अवसर समेत सिर्जना हुने उनले बताए ।

वडा नम्वर ३ का अध्यक्ष दिपक पाण्डेले स्थानीयको बुझाइ फरक पर्दा समस्या भएको बताए । ‘मनकामनाको सबै फोहोर ल्याएर डम्प गर्न खोजे, यो ठाउँलाई बन्चरेडाँडा बनाउन खोजे भन्ने स्थानीयको बुझाइ छ तर, यो त्यस्तो होइन । सुख्खा ल्याण्डफिल्ड साइड हो,’ उनले भने । खानेपानी मुहानलाई समेत यसले असर नगर्ने उनको तर्क छ ।

फोहोरलाई मोहोरमा परिणत गर्ने लक्ष्यसहित पाइलट प्रोजेक्टको रुपमा यो योजना लागू गर्न लागिएको पालिका अध्यक्ष रमेश थापा मगरले बताए । वस्ती र खानेपानी मुहानमा यसले कुनै असर नगर्ने भन्दै ल्याण्डफिल्ड साइड निर्माणमा सहयोग गरिदिन उनले स्थानीयलाई आग्रह गरेका छन् ।