जिल्ला प्रहरी कार्यालय गोरखाले एक बर्षको अवधिमा ८३ जना फरार अभियुक्त पक्राउ गरेको छ । बिभिन्न कसूरमा कैद तथा जरिवाना सजाय तोकिएका उनीहरुबाट ४८ लाख ९३ हजार जरिवाना असुल उपर गरिएको कार्यालयले जनाएको छ । ११ बर्ष ८ महिना २८ दिन कैद भुक्तान समेत भएको जिल्ला प्रहरी प्रमुख एसपी भरतबहादुर बिकले बताए ।
जरिवाना स्वरुप सबैभन्दा बढी सोनाम दोर्जे लामाबाट ११ लाख ६ हजार ७ सय ९० रुपैया जरिवाना असुल उपर गरिएको उनले जानकारी दिए । लामा चुमनुव्री गाउँपालिका–२ का हुन् । बैदेशिक मुद्रा अपचलन सम्बन्धी कसूरमा मुद्दा दर्ता भएका उनलाई जिल्ला अदालतले उक्त रकम बराबरको जरिवाना तोकेको थियो । त्यसयता उनी फरार थिए ।
पक्राउ परेका फरार अभियुक्तमध्ये अधिकांशलाई अभद्र व्यवहार तथा शान्ति बिरुद्धको कसूरमा मुद्दा दर्ता भएर कैद तथा जरिवाना सजाय सुनाइएको थियो । पछिल्लो समय फरार अभियुक्त पक्राउ अभियानलाई तिव्र बनाइएको एसपी बिकले बताए । ‘हामीले बिशेष खालको अपरेशन नै संचालन गरेका छौ,’ उनले भने, ‘फरार अभियुक्तहरुको खोजी कार्य पनि तिव्र पारिएको छ ।’
ज्यान सम्बन्धी र बैकिङ कसूरको मुद्दा बढ्दो
गत आव (२०८१\८२) कार्यालयमा कुल ३ सय ३० वटा मुद्दा दर्ता भएका छन् । सबैभन्दा बढी ज्यान सम्बन्धीका मुद्दा रहेको एसपी बिकले जानकारी दिए । उनले भने, ‘ज्यान सम्बन्धी ६६ वटा मुद्दा दर्ता भयो, त्यसपछि बैकिङ कसूरको छ ।’ बैंकिङ कसूर सम्बन्धी ५९ वटा मुद्दा दर्ता भएको उनले जानकारी दिए ।
उनका अनुसार अघिल्लो आर्थिक बर्ष २०८०\८१ मा ज्यान सम्बन्धी ६३ र बैंकिङ कसूर सम्बन्धी ४३ वटा मुद्दा दर्ता भएका थिए । करणी सम्बन्धीका घटनामा भने केही कमी आएको उनले बताए । ‘अघिल्लो आर्थिक बर्ष करणी सम्बन्धी ३७ वटा मुद्दा दर्ता भएको थियो तर गत आव २३ वटा मात्रै छ,’ उनले भने । नागरिकता सम्बन्धी मुद्दा दर्ता हुने क्रम पनि बढ्न थालेको एसपी बिकले बताए । अघिल्लो आव ९ वटा मुद्दा दर्ता भएकोमा गत आव दश पुगेको उनले जानकारी दिए ।
अपराधिक घटना न्यूनिकरणका लागि बिभिन्न अभियान संचालन भइरहेको कार्यालयले जनाएको छ । पेट्रोलिङ गस्ती र सचेतनामूलक कार्यक्रमहरु बढाइएको एसपी बिकले बताए । ‘गत आव मात्रै हामीले १६ सय भन्दा बढी सचेतनामूलक कार्यक्रम संचालन ग¥यौ, करिव २७ हजार लाभान्वित भए,’ उनले भने । बिद्यार्थीहरुलाई लक्षित गरी प्रहरीसँग एक दिन कार्यक्रम पनि संचालन गर्दै आएको उनले जानकारी दिए ।
